Алматы қаласының әкімі Б.Сағынтаевтың назарына

 Ару қала атанған Алматының ауру мәселелері де толып жатыр. Соларды әр ауданға, әрбір ықшамауданға жіліктер болса, мәселенің нөсерінде қалары тағы бар. Бүгінгі сөз Алатау ауданына қарасты Саялы ықшамауданына қатысты болмақ.

Атауымен талайларға арман болған, ал қазіргі тұрғындарға пана болған бұл ықшамаудан сырт қарағана жанға ешбір қалтарысы жоқтай тым бейқам көрінеді. Әйткенмен қордаланған мәселелерін санамалап арыз ғып арқалап, әкімдіктің табалдырығын тоздырған халықтың әлі де айтары бар. Сол қабатталған, әлденеше жылдан бері қатталған тығырықтан шығудың амалдарын аудандық әкімдіктен сұрап, ағымдағы жылдың 14 қаңтар күні мен әкімнің қабылдауына бардым.  Жаңажылдық мереке күндері тұрғындар қол қусырып отырмай, төменде аталған мәселелердің шешілуіне мүдделі екендіктерін атап жазып, өтінішке қол қойған болатын. Сол 250 тұрғын қол қойған өтінішті аманаттай арқалап, әкім Рыспаев Шахмерден Сыртбайұлының алдына қойдым. Мыңдаған тұрғынның атынан 250 өкілі қол қойған бұл өтініште көтерілген басты мәселелер төмендегідей еді. Саялы негізін бағдаршамның қос қанатында бір және екі деген атпен бөлінеді. Өтінішке үміт артқан тұрғындардың дені Саялы-1 ықшамауданынан болды.

Бір жылдан астам уақыт бұрын ғана бой көтерген түкпірдегі отбасылардың мұң-зары аялдама жайынан ағытылды.Жаңа үйлерге өткен жылдың наурыз, сәуір айларында қоныстанған халық жақын маңда белгіленген аялдама жоқтығына наразы.

Иә,біріншіден халық арасында  «сұр үйлер» атанған бұл аумақққа жақын аялдама жоқ. Тұрғындар таңның атысы, кештің батысы жарты шақырымдай қашықтықтағы (ең жақыны сол ғана) аялдамаға сабылып баруға мәжбүр. Осылайша әлдеқалай «ұмыт қалған» халық алыстағы аялдаманың зарын шегіп жүр.

Екіншіден, өмір мәселесіне айналған жағдай-аялдама белгіленбеген бұл тұста жаяу жүргінші жолағы да қарастырылмаған. Көлік ағылған жолдың қос қапталына жалтаңдап, жаутаңдап өтуден басқа амалымыз жоқ. Жалпы, бұл орталық көшеде №180 жалпы білім беретін мектептің тұсында және автокөлік қызмет көрсету орталығының ғимараты шенінде ғана жаяу жүргінші жолағы бар. Одан ары жаяу жүргіншілердің жолдың арғы-бергі бетіне өтуі «ұмытылп қалған». Бұл мәселеден аудан әкімі хабарсыз болып шықты. Рыспаев алдымен сөзіме күмін келтіріп, «жаяу жүргіншілер жолағы бар, «Сергек» бар» деді. Артынша Саялыының тұрақты тұрғыны екенімді айтқанда барып, бір қызметкерін шақырып, мәселені сол тұлғаға жүктеді. Жаяу жүргінші жолағымен мығым басып өтер күн де туар деп қуанып қалдым.  Тұман қалың түскен бір кеште жұмыстан келіп, үй жақ қанатқа өте алмай, он минуттай бөгелгенім бар-тын. Сондай жағдайларға нүкте  қойылуын барлық тұрғындар жан-тәндерімен тілеп отыр. Өйткені бұл жай жолақ емес, өмір қауіпсіздігі мәселесі. Қанды оқиға орын алмай тұрғанда, ешкімді көлік қақпай, аман-сау жүрген шағында жаяу жүргінші жолағы тиісінше орнатылса  деген тілегіміз бар.

Үшіншіден, саялылықтардың бірнеше жылдан бері бас ауруына айналған, бірақ ешбір құдірет иесі шеше алмаған мәселенің мәйегі-автобус жайы. Негізінен, Саялы ертегінң батырларындай тез өсіп клее жатқан ықшамаудан. Осыған қарамастан жолаушылардың қатынау мәселесі қияметтің қайымы. Сөз болған өтініште тұрғындардың көпшілігі Саялы-1 ықшамауданынан «Сәлем» базары арқылы қатынайтын автобусқа мұқтаждықтарын жазған. Бұл жайттан әкім Рыспаев құлағдар екен. Өз тарапынан жасалған  істерді де атап өтті. №57 маршрут бұрынғыдай Саялы 1-ден тоқтап қалмай, Саялы-2-ге аялдайтын болған. Бірінші жартыжылдықтың жоспарында №133 маршрутты шығару жоспарда бар екенін мәлімдеді. №57 автобусқа кешкі уақытта жолаушылар сыймай жолда қалып қоятындарын айтқанымда, бұл мәселенің шешімін де қарастырғандарын жеткізді. Ол маршрут жиі қатынауы үшін жаңа автобустар қосып берілетінін хабардар етті. Тек бұның барлығы бірінші жартыжылдықта іске асатынын көңілге күдік бұлтын үйіреді. Өйткені жоспарда бар, өмірде жоқ  әрекет болып қалмаса екен деп қауіптенеміз.

Араға бір апта уақыт салып, менің 250 тұрғын қол қойған өтінішіме Алатау ауданы әкімінің орынбасарынан жауап хат келді. Онда менің өтінішімнің Алматы қаласы қалалық мобильділік басқармасының басшысы С.Т.Телібаевқа және Алматы қаласының әкімшілік полиция басқармасының басшысы Ж.Д.Мұратәлиевтің назарына ұсынылғаны хабарланған. Халықтың базынасы аудан деңгейінен қала көлеміне жеткендігі жақсылық хабардың нышанындай көрінді.

Саялылықтардың тынысы неден тарылып жүргенінен хабардар болған әкім Ш. С. Рыспаев орнынан ауысып, енді бұл лауазымды Қалдыбеков Азамат Бескепмірұлы атқаруға кірісті. Жаңа әкім есеп беру жиынында Саялы-2 ықшамауданынан Алматы-1 және аэропорт бағытына №33 маршрут наурыз айында шығатынын айтып халықты бір қуантты. Алайда Саялы-1 тұрғындары үшін бұл аса қолайлы болмай тұр. Аялдамаға зар болған халық Саялы-2 қанатына жету үшін бәрібір автобуспен келеді. Одан ары «Сәлем» базарына жету үшін бұрынғыдай үш бірдей атвобуста сенделуге тура келіп тұр. Сондықтан Саялы-1 ықшамауданының тұрғындары қала билігінен  автокөлік қызмет көрсету орталығынан кейін тағы бір аялдама орнатуларын, сол араға жаяу жүргінші жолағын бекітуді, ең бастысы-экс әкім уәде еткен №133 автобустың дәл осы Саялы-1 аумағынан  жолға шығуын қиыла өтінеді. Қиылмай қайтсін, көз жеткен жерге аяқтары жетпей шаршағалы қашан?! Кешкі уақытта таксишілердің имандарын ұмытып, аязды, жаңбырлы күндері бүрсеңдеген халықтың қалтасын қағатындары тағы бар. Саялы-1 ықшамауданынан сая тапқан көп халық аталған үш мәселе жоспарға сай  белгіленген уақытта жүзеге асар деген үміттері бар. Әйтпесе ішкі жолдарды өздері-ақ қардан аршып алып, өз күндерін өздері көріп жүрген көнбіс халық бұдан ары күн сайын діттеген жерлеріне таксимен баруды шырғалаңның шешімі деп бағалай алмайды.

Айзат Рақыш                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                             

 

 

ЖАУАП ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз

This site uses Akismet to reduce spam. Learn how your comment data is processed.