BBC тілшісі Джеймс Галлахер: «Үндістан бір апта бойы тәулік ішінде коронавирус жұқтырғандар саны бойынша әлемдік рекорд орнатуда. Бірінші толқында тәулігіне 93 мың тұрғын коронавирус жұқтырса, 17-і сәуірден бастап күнделікті статистика 200 мың адамға дейін көтеріліп, соңғы аптада күніне 350 мың адамға жетіп отыр. Өлім саны да бірінші толқынмен салыстырғанда екі есеге артты. Соңғы аптада Үндістанда тәулігіне коронавирустан орташа 2 336 адам қайтыс болуда. Елдегі ең ауыр жағдай Делиде, мұнда ауруханаларда ӨЖЖА орнатылған орындар қалмаған. Басқа ірі қалаларда да жағдай осындай. Ресми статистика бойынша, пандемияның басынан бері Үндістанда 17 млн адам коронавирус жұқтырып, 192 мың адам қайтыс болған. Халық санының көптігі және олардың ұдайы жылжып отыруы Covid-19-ға тестілеу өткізуге және нақты өлім саны бойынша есеп жүргізуге кедергі келтіреді. Сол себепті Үндістандағы дағдарыстың шынайы масштабын бағалау қиынға соғып отыр. Елдегі масштабты вакциналау бағдарламасы үлкен қиындықтарға тап болуда. Бұл бағдарлама 16 қаңтар күні басталған, шілдеге дейін 250 млн адамды вакциналауды көздеген. Қазіргі кезде вакцинаның бірінші дозасын 118 млн адам ғана алған, бұл – халықтың 9 пайызы. Пандемия бізге барлық ел проблемаларының ортақ екендігін түсіндірді. Бір Қытай қаласында пайда болған коронавирус енді бүкіл әлемде», – деп хабарлады. Індет жұқтыру рекорды Үндістан шекарасын асуы мүмкін, сол себепті көп елдер бұл елмен әуе қатынасын тоқтатты. Британия, Бразилия және Оңтүстік Африкада пайда болған коронавирустың жаңа түрі өзге елдерде үлкен проблемалар тудырды. Физика және биология профессоры, жұқпалы ауруларды модельдеу саласындағы сарапшы Менон Үндістанда вирустың жаңа түрі пайда болуы мүмкін екендігін ескертті. Дүниежүзілік қауымдастық Үндістанға дағдарысты жеңуге көмек көрсетуде. Ұлыбритания елге ӨЖЖА және коюланған оттек қорларын жіберді, АҚШ Үндістанға AstraZeneca вакцинасын көп мөлшерде өндіруге мүмкіндік беру үшін бастапқы материалдар экспортына тыйымды уақытша алып тастады. Көптеген елдер білікті қызметкерлер мен жеке қауіпсіздік құралдарын ұсынуда.

ЖАУАП ҚАЛДЫРУ

Пікіріңізді енгізіңіз!
Атыңызды енгізіңіз