Мемлекеттік хатшы Рекс Тиллерсонға Пхеньянның ядролық және зымыран бағдарламасына қатысты Солтүстік Кореямен келіссөз жүргізбек болып, уақытын зая кетіріп жүргенін айтқан АҚШ президенті Дональд Трамп Twitter-де: «Мен біздің тамаша мемлекеттік хатшымыз Рекс Тиллерсонға кішкентай зымыран адаммен келіссөз жүргізуге талпынып, уақытын босқа шығындап жүргенін айттым»,— деп жазды Солтүстік Корея басшысы Ким Чен Ынды меңзеп. Трамп тағы бір твитінде: «Рекс, күшіңді сақта, біз істелінуі тиіс нәрсені істейміз»,— деп жазды. Бірақ ол нақты нені меңзеп тұрғанын айтпады. Трамптан бір күн бұрын Тиллерсон АҚШ билігінде «Пхеньянмен байланыс орнату желілері» барын мәлімдеген. Соңғы уақытта Солтүстік Кореяның ядролық және баллистикалық зымыран бағдарламаларына қатысты шиеленіс күшейіп барады. Екі ел басшылары бір-біріне қатысты доқ көрсетіп, қатқыл мәлімдемелер жасап жатыр. Қыркүйекте Солтүстік Корея қуатты сутегі бомбасын сынаған соң БҰҰ Қауіпсіздік кеңесі Пхеньянға қарсы санкция салған-ды. Соның ызғары әлі де байқалатындай.

ЖАУАП ҚАЛДЫРУ

Пікіріңізді енгізіңіз!
Атыңызды енгізіңіз