ТҰҢҒЫШ ПРЕЗИДЕНТ КҮНІНЕ ОРАЙ ЖАЗЫЛҒАН ОДА

0
986

 Тұңғыш президент күнін келекелеп жатқандарға айтар датым бар! Неге осы біз қызғаншақпыз, күншілміз? Елбасының ерен еңбегін біле тұра, кенен еркелігіне де көнуге шыдамаймыз. Мұқағали ақынның «Шыда, шыда, шыдай түс, шыда тағы, шыдамдыны мына өмір ұнатады» дегенін неге естен шығарып ала береміз, ә?

Бір заманда Ленин мен Сталинді жырға қоспаған ақын- жазушы жоқ еді ғой, тәйірі! Солардың кейбіреуі әлгі күнге ардақты! Кейбірінің атында көшелер бар. Тіпті қала атын иеленіп қақшиып тұрғандарға табынушылар әлі жетерлік. Оларды дау- дамайдан аршып алу үшін сол дәуірдегі жүйені кіналау басым. (Ертең бізде де солай болмасына кім кепіл? Бүгінгі жазғыштар 180 градусқа жалт бұрылып, ақталуға тырыспасына сенімдіміз бе?).
Сол секілді Елбасы туралы толғаған (жалғыз Балтабек емес қой) қаншама поэма, арнау өлеңдер сөреде тұр. Қаншама қайраткер «тынымсыз еңбегі» үшін мансап жолында өрледі. Оларды кейін сол үшін ешкім таяқтай қоймас…Атақ – абыройын ешкім тартып ала алмас. Әйтседе ар сотына тартылып жатса, небір сенсация көрініс беріп қалар бәлкім.
Айтпақшы, тұңғыш Президентіміз сегіз қырлы, бір сырлы кісі ғой, пай-пай. Палуан, (еркін күрес шебері), әнші, ақын, шешен…оратор…стратег, қырық айлалы саясаткер, дипломат, данышпан, сақа ұйымдастырушы, көреген басшы, әккі…. «Болар бала боғынан» демекші, тәуелді телеарналардағы «тәуелсіз» тамыр- таныстарының, жолдас- жораларының, сыныптас кемпір- шалдардың естеліктеріне сүйсінбеуге дәтің шыдамайды ғой, шыдамайды ? Бәрі де тайпалтып жатыр сөз – жорғаны… Неткен алғыр бала болған десеңізші! Тіл мен көзден қалың елі қазағы үшін, «Ұстарасыз аузына мұрты түскен» жұрты үшін, оларға тәуелсіздік әперу үшін аман қалғанының өзі неге тұрады?
Бір әттеген – айы, ешқайсысы Мырзатай (Жолдасбеков) көкемдей «маңдайы жарқыраған баланың» болашақ президент екенін сезіне алмағандары ғана көңілге кірбің түсіреді… Әйтпесе бәрі тамаша!

Екі сөйлемейтін ер мінезі қандай! Жарқырап атқан таңдай емес пе?!
Елін өрге де, белге де сүйреді. Керек десеңіз, президенттіктен кетсе де, ел ертеңі үшін ешкімге сенбей, барлығын өзі атқарып жүр. Мұның өзі түсінгенге Елбасының ұлтжандылығының бір парасы ғана. «Жаса, Тұңғыш президент» деп қалай айтпайсың осыларды көре тұра… Қалай тойламассың жылына екі мәрте құрмет үшін. Сол екі мерекеде күйкі тірлікпен жағаласқан, айлығы – шайлығына жетпейтін қаншама халық демалып бір жасап қалады. Бұл да болса елге жасаған бір көмегі….Жақсылығы…
Елбасының өзі қаншама әнге сөз жазып тастағанын телеарнадан естіп қатты разы болдым бүгін. (Білмей жүрген ағайынға құлаққағыс сөзім бұл).

Айтайын дегенім, қаптап кеткен Мырқымбай ақындар бұл кісінің қасында шимай- шатпақтарыңмен жіп есе алмайсыңдар негізі. Біле жүріңдер оны да…. Тұңғыш Президенттің жүріп өткен жолының бәрі тарих… Ешкім оларды жойып жібере алмайды. Оған ізбасарлары мүмкіндікте бере қоймас әрісі.

Біз, Тұңғыш Президент дәуірінде ғұмыры кешкенімізді мақтан етейік. Ертең бұл заманды сағына еске алып жүрмейік. «Қолда бар да алтынның қадірі» болушы ма еді?

Алтынды тот баспайтынын естен шығармайық дегім келеді. Қартайған адамда бір бала дегенді мен айтқан жоқпын, ағайын. Бабалар айтқан. Демек, ол кісілер бірдеңені біліп айтқан болар …

Нағашыбай Қабылбек

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.