2025 жылғы 10 шілдеде Түркі мәдениеті және мұрасы қорының кеңсесінде Мажарстан Үкіметінің түркі мәдени ынтымақтастығы және Мажарстан-Түркия ғылым мен инновация жылы мәселелері жөніндегі өкілі Петер Хоппал мырза мен Мажарстанның Әзербайжан Республикасындағы Төтенше және Өкілетті Елшісі Тамаш Торма мырзаның сапары өтті.
Қор Президентімен өткен кездесу барысында ұйым мен Мажарстан арасындағы ынтымақтастықтың қазіргі жағдайы, бірлесіп жүзеге асырылған бастамалар және болашақтағы даму перспективалары жөнінде кең пікір алмасу болды. Мажарстанның бақылаушы ел ретінде Қордың қызметіне қосқан үлесі ерекше атап өтілді.
Кездесу барысында түркі және мажар халықтарының тарихи байланыстары мен мәдени дипломатияны нығайтудың маңыздылығы айрықша атап өтілді. Сарапшылармен алмасу, академиялық ынтымақтастық және бірлескен баспа жобаларын дамыту жолдары талқыланды.
Түркі мәдениеті және мұрасы қорының президенті Ақтоты Райымқұлова Мажарстанның ұйым жұмысына тұрақты қызығушылығы мен мәдени жобаларға белсенді қатысуын жоғары бағалады. Ол Мажарстанмен ынтымақтастықтың мәдени көпір ретіндегі маңыздылығын және түркі мен еуропалық халықтар арасындағы өзара түсіністік пен мәдени жақындасу тұрғысынан ерекше мәнге ие екенін атап өтті.
Өз кезегінде Петер Хоппал мырза Мажарстанның Түркі әлемімен ынтымақтастыққа дайын екенін және Қордың ауқымды қызметіне қатысуға ниетті екенін білдірді. Ол алдағы ынтымақтастық перспективаларына қатысты ұсыныстарымен бөлісті.
Екі тараптың табысты жүзеге асырып жатқан жобаларының ішінде түркі халықтарының фольклорына арналған көптомдық басылымның дайындалуы ерекше атап өтілді. Жобаның басты мақсаты – түркі халықтарының мол рухани мұрасын – ертегілерді, аңыздарды, мақал-мәтелдерді, баянаттарды, эпостар мен басқа да фольклор жанрларын жүйелеу және оны болашақ ұрпаққа жеткізу. Мажарстанның бұл іске қатысуы мен көрсеткен қолдауы ерекше атап өтіліп, жоғары бағаланды.
