Дәулет Өсербай: Жігітке жеті өнер де аз

0
1844

Арманы асқақ Дәулет

Біздің бүгінгі сұхбаттасымыз – джиу-джитсу күресінен спорт шебері, ережесіз жекпе-жектен жастар арасында әлем чемпионы, әскери самбо бойынша Қазақстан чемпионы, актер Дәулет Өсербай жайлы болмақ. Жас жігіттің спортта да, өнерде де ауыз толтырып айтатын жетістігі жетерлік.

— Дəулет жекпе-жек өнері қазақтың қанына біткен өнер емес пе? Спорттың сенің өміріңдегі орны қандай?
— Кішкентай кезімнен спортты ұнаттым. Теледидардан көрген спортшылардың еңбегіне құмарттым. Ағам Медет екеуіміз бала кезімізден спортқа шындап ден қойып, шымыр болып өстік. Анам Бағлан Назаров ағамызға күреске апарды. Спортқа келуіме Анам себеп болды десем болады. Алматы облысы Райымбек ауданы Көксай ауылында дүниеге келгенмін. Ережесіз жекпе-жекке қызығушылығым артып Ардақ Назаровтың залына келдім. Мектеп табалдырығында жүріп, аудандық, республикалық жарыстарда бақ сынадым. Таңертеңгілік жүгіремін, жаттығу жасаймын. Спорт біртіндеп өмірімнің ажырамас бөлігіне айналып отыр. Мен күні бойы тек жаттығумен айналыспаймын. Жалпы айтқанда, мен тек спортты ойлаумен шектеліп қоймаймын.
— Спорт – бұл жүрек қалауы. Биік белестерді бағындырып жүргеніңді білеміз сол туралы айтып берсең?
— «Әлем – Файтерстің» жігіттерімен әлемнің біраз елдерін араладық. Ресейдiң Краснодар қаласында ережесiз жекпе-жектiң ММА түрiнен жастар арасында өткен әлем чемпионатында Сырым Бектұрсын досым екеуміз қатыстық. Қытай елінде “SUPERSTAR FIGHT” тұжырымы бойынша 65 келі салмақта бағымды сынадым. Қарсыласым қытайлық Yao Honggang болды. Стамбул қаласында панкратионнан өткен әлем чемпионатында 2 орынды иелендім. Қарсыластарым маған тегеурінді қарсылық танытса да, қазаққа тән қайсарлықпен дегеніме жетіп, алтыннан алқа тақтым. Жеңіс оңай келмейді. Жеңілістер, сәтсіздіктер, қиындықтар да кездесті. Әр жарыс сайын өзіңнің өзгеріп жатқаныңды байқап, одан да жақсы нәтижелерге ынталы боласың.
— Ерте ме, кеш пе әр ата-ана баласын қандай да бір спорт үйірмесіне беру туралы шешім қабылдайтын кез келеді. Бауыр еті баласын жақсы жаттықтырушыға берсем деген ниет кез келген ата-ананың көкейінде. Жаттықтырушы болу қиын ба?
— Әркім өзі қалаған спорт түрімен айналыса алады. Жер бетінде әркімнің қабілеттілігіне қарай көптеген спорт түрлері дамыған. Спортпен айналысу үшін небәрі жігер жеткілікті. Жаттығуды бастау үшін ештеңенің қажеті жоқ. Спорт тек төзімділік пен физикалық дайындықты арттыруға ғана көмектесіп қоймай, сонымен бірге жауапкершілікті бойға сіңіруге мүмкіндік береді. Жаттықтырушы – балаға әрдайым қолдау көрсетіп және бағдар беретін, кеңес айтып және жіберлендіретін,сізге жағымды ықпал ететін, дұрыс және тез арада қажетті нәтижелерге жету үшін бар күшін салатын адам. Менің шәкірттерім әр жаттығудан ұмытылмас тәжірибе алса деймін. Жаттығу уақыты мен қайталау санын ғана тіркеп қана қоймай, жаттығуларды сапалы түрде аяқтауын бақылаймын. Бұл жалпы нәтижелерге қол жеткізуде өте маңызды. Денсаулыққа саналы қарап, спортпен шұғылданып, уақытында тамақтанып, дене ахуалының бабында болуына жағдай жасау керек

.
— Дәулет балаларға қандай да бір талап қоясыз ба?
Жаттығуға келген балаларды күшті я болмаса, әлсіз деп бөліп жармаймыз. Біз спортқа ынтасы бар жігіттердің барлығын қабылдауға әзірміз. Спорт міндетті түрде жақсы нәтижелерге жеткізеді, ал мінез-құлықты шынықтыру өмірдегі кедергілерді жеңуге көмектесіп, тек алға жетелейді.
— Жаттығуды қалай ұйымдастыра-сың? Күніне қанша уақыт дайындаласыздар?
— Күн тәртібіміз «Barys» спорт клубының бағдарламасына сай жүреді. Таңертең тоғызда және кешкі бесте екі уақыт жаттығу болады. Осы ретте біздің алаңсыз жаттығу жасауымызға, түрлі жарыстарға барып-қайтуымызға қолдау білдіріп отырған мектебіміздің басшылығына ерекше алғыс білдіре кеткім келеді. Шәкірттерім өздеріне берілген тапсырманы тыңғылықты, мұқият орындауға тырысады. Қай уақытта болмасын жарыстарға дайын тұрады. Бар ойымен, жанымен спортқа құлай берілген балалар баршылық. Спортта шыдамдылық керегін, төзе білу керегін балаларға үнемі айтып отырамын. Спорттың арқасында өздерінің біраз дәрежеге жететінін түсінетін шәкірттерім де бар. Ол үшін, әрине, ойынды қойып, еңбек етуге тура келеді. Сол үшін тынбай еңбек етіп жатыр.
— «Жігітке жеті өнер де аз» деген. Сені отандық телехикаялардан да көріп көзайым болудамыз. Киноға қалай келдің?
— Адам мықты денсаулықтың арқасында өмірде кездесетін ауыртпалықтарды жеңуге, қабілет-дарынын дамытып, шығармашылық денгейге көтеріле алады. Киноға келуіме спорттағы жетістіктерім тікелей себеп болды. Өнерге қызығушылығым артты. Ең алғаш «Хабар» телеарнасының тапсырысы бойынша түсірілген 25 бөлімді «Келінжан» фильмінде бағымды сынадым. Үлкен отбасының кенже ұлы Асқарды ойнадым. Продюсер — Гүлнұр Мамасарипованың «Келінжан» фильмі менің өнерге, киноға деген қызығушылығымды оятқан туынды болды. Сюжетте қаладан ауылға жас келін алып келемін, ол ауылдағы жаңа өмірге үйренуі тиіс. Ол көне дәстүрлерді үйреніп қана қоймай, бейтаныс адамдармен тіл табысуға тырысады. Сондай-ақ, «Ауылдастар 4» деген атпен тағы бір туынды дайындалып жатыр», «Сарбаз», «Кебенек» телехикаяларына түсіп жатырмын. «Көкжал» телехикаясында басты рөлді сомдадым. Алдағы уақытта көрерменге жол тартады. «Көрерменнің ықыласына бөленеді деген ойдамын. Киноға түсу барысында қазақтың көптеген тұлғаларын көріп, өзіме үлкен тәжірибе жинақтадым.
— Өмірдегі Дәулет пен кинодағы кейіпкерлеріңнің арасында байланыс бар ма?
— Әр образдың өз ерекшелігі бар. Жағымсыз болсын, жақсы болсын образды Дәулет Өсербай жасап жатқандықтан мен арқылы сүзгіден өтеді. Сондықтан, әрбір рөлде кішкене болсын мен бармын. Себебі, адамның бойында жақсы да, жаман да мінез болады. Бірақ, қайсысын тәрбиелейсің сол сенің бейнеңді айқындап тұрады. Әрбір рөл өзінше ерекше.
— Армандар орындалады, мақсатың айқын болса» дейді. Алға қойған арман, мақсатың туралы айтып өтсең?
— Ағам Медет екеуіміз «Barys» спорт клубында жекпе-жек түрінен жас спортшыларды қабылдап, күрес өнерінің түр-түріне үйретудеміз. Болашақта мақсатым үлкен спорт мектебін ашу.
— Сұхбатыңызға рахмет! Жеңісті сәттеріңіз көп болсын!

 

ТҮЙІН. Қазақ «бесаспап жігіт» деп осындайда айтса керек. Сұлу келбетті, кең иықты жас жігіт алтын жүлдемен исі қазақты әлі талай қуанышқа бөлейді деген үміт зор. Өйткені, арманы биік адамның алар асуы да биік демей ме халқымыз?! Жоғарыда айтылғандар – кейіпкеріміздің өміріндегі күш-жігер, жаттығу мен тәртіптің аз бөлігі ғана. Дәулетпен әңгімелесе келе, осындай жалын атқан жастарды тасада, ескерусіз қалдыруға болмайтынын түсіндім. Жүректілік пен батылдықты қажет ететін спорт түрін өміріне серік еткен жас барыстың алар асулары әлі алда.
Құрметі – тектілігінде, құдіреті –
жүректілігінде. Осындай сегіз қырлы, бір сырлы жігіттеріміз көбейе берсін деп түйіндейік.

Гауһар Тұрсынқожа

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

This site uses Akismet to reduce spam. Learn how your comment data is processed.