Құрметті достар!

Баршаңызды Ұлыстың ұлы күнімен шын жүректен құттықтаймын!

Наурыз – ырыс-ынтымақты арттыратын, ұлтты ұйыстыратын, ізгілікті дәріптейтін мейрам. Халқымыз ежелден бұл күнді жыл басы санап, оны ерекше қуанышпен қарсы алған. Тәуелсіздіктің арқасында әз-Наурыз, шын мәнінде, жалпыұлттық мерекеге айналды.

Өкінішке қарай, биыл коронавирустың таралуына байланысты ұлтымыздың ұлық мейрамын толыққанды тойлай алмай отырмыз. Өйткені, дәл қазір біз үшін ең маңыздысы – азаматтарымыздың денсаулығын қорғау. Осы мақсатпен мемлекет тарапынан нақты шаралар қабылданып, тиісті жұмыстар жүргізіліп жатыр. Соның бәріне түсіністікпен қарайық. Сындарлы сәтте бірліктің озық үлгісін көрсетейік.

Әрине, мерекелік көңіл-күйге ешқандай шектеу жоқ. Сондықтан бүгін әз-Наурыздың еліміздегі әр отбасында атаусыз қалмайтынына сенімдімін. Ұлыстың ұлы күнінде шаңырақтарыңыз шаттыққа кенелсін!

Әлемді әбігерге салған індеттен еліміз аман-есен құтылып, арқа-жарқа күнімізбен тезірек қайта қауышуды жазсын! Жаңа жылымыз тек жақсылық әкелсін! Сіздерге мықты денсаулық, бақ-береке және толайым табыс тілеймін!

Ұлыс оң, ақ мол болсын!

Маулен Ашимбаев

ЖАУАП ҚАЛДЫРУ

Пікіріңізді енгізіңіз!
Атыңызды енгізіңіз