Қос ғашықтың ерлігі

0
104

Олар кешегі ызғарлы желтоқсанның қанды оқиғасының куәгерлері болған ерлі-зайыптылар. Екеуі де Алматы құрылыс техникумында бірге оқыпты. Сырт көзге қарапайым, көп сөйлемейтін ұяң көрінетін екеудің көздерінен әңгімелесе келе бір қайсарлықтың ұшқынын көргендей болдым. Бердібек Мұсағалиев: Мен Абай, Шәкәрім, Мұхтар туған Семей өңірінің тумасымын. 1981 жылы Үржар ауданы, Елтай ауылының Ы.Алтынсарин атындағы орта мектебін бітіріп, 1982 жылы көктемде әскер қатарына бардым. 1985 жылы Алматы құрылыс техникумына оқуға түстім. Жұбайым Гүлзира Сағатовамен бірге оқыдым. Екеуміз бір-бірімізді ұнатып, қыз бен жігіт болып жүрген кезіміз. Сөйтіп жүргенде Желтоқсан көтерілісі басталып кетті. 17 желтоқсан күні алаңға митинг болады екен дегенді естіп бәріміз көшеге шықтық. Сол күні Гүлзира екеуіміз де жұбымызды жазбастан қол ұстасып бірге бардық. Қасымызда курстас бір топ қыз-жігіттер: Иманқұлов Сәкен, Толкумбекова Гүлнара, Құрбанбаев Убайдулла, Искакова Клара, Есімбеков Елгедай, Сатыбалдиев Диас, т.б. болды.

Ойымызда жаман ештеңе жоқ, бір жағынан қызықтап әрі Д.Қонаевты орнынан алып тастап Г.Колбинді бізге басшы етіп тағайындағаны үшін өзіміздің қарсы үнімізді білдіріп, митингіге қатысайық деп алаңға шыққан едік. Бірақ біздің талабымызды ешкімнің тыңдағысы келмеді. Кешке алаңда сұмдық оқиғалар болды. Өрт сөндіруші машиналар келіп бізге су шаша бастады. Айғай-шу, қырғын төбелес, жылаған дауыстар, ешкімді ешкім тыңдар емес… Біз сол кездегі жастар ұлт намыс үшін алаңға шыққан едік. Бірақ мен титтей де өкінбеймін, бұл менің азаматтық борышым, міндетім деп түсінемін.

Күлзира Сағатова:

Иә, сол 1986 жылғы қанды желтоқсанды ешуақытта ұмытпайтын шығармын. 1984 жылы Алматы облысы, Жамбыл ауданы, Рославль орта мектебін бітіріп, Алматы құрылыс техникумына түстім. Курстасым Бердібекпен сөзіміз жарасып, дос болып жүрдік. 3 курста алаңға курстастар бәріміз бірге бардық. Бірақ ол жерде бізді қудалап, қысым көрсетіп, таяқ жеп, жан-жаққа бытырап қашуға тура келді. Әйтеуір Фурмановтан Абай даңғылына шығып, автобусқа отырып үйіме әзер жеткенім есімде. Сондай тарихи мәңгі ұмытылмас оқиғаның ортасында болып, қатысқанымды мақтан етемін.

 

Ш.Биекеева

ПІКІР ҚАЛДЫРУ

Пікіріңізді енгізіңіз!
Атыңызды енгізіңіз

Этот сайт использует Akismet для борьбы со спамом. Узнайте, как обрабатываются ваши данные комментариев.