26 мамыр күнгі Парламент Мәжілісінің жалпы отырысында депутат Жанарбек Әшімжанов Білім және ғылым министрі Асхат Аймағамбетовтің атына «Әліппе» және «Ана тілі» оқулығына қатысты депутаттық сауал жолдады. Иә, «Әліппе» жайлы мәселе бұған дейін де көтерілген. Бірақ бұл жолға сауал мән-мағына жағынан мүлде бөлек.
«Біз білімнің іргетасы саналатын сол «Әліппеден» еш негізсіз бас тарттық. Арадағы «Әліппесіз» өткен жылдар сол қадамның үлкен қателік болғанын анық көрсетті. Оқу саласы онсыз да оңбай тұрған еді, 2019 жылдың соңында Экономикалық ынтымақтастық және даму ұйымы (ЭЫДҰ) мен Білім жетістіктерін бағалау жөніндегі халықаралық қауымдастық (EA) білім беру саласындағы үш халықаралық салыстырмалы зерттеудің нәтижелерін жариялады. Қазақстан бұл ұйымдардың зерттеуі бойынша үшеуінде де аутсайдер болды. Осы орайда, ұлттық тәрбиеге баса назар аударуды міндеттеген Мемлекет басшысы Қасым-Жомарт Тоқаев сапалы және кәсіби оқулық әзірлеуді қатаң тапсырған. Білім және ғылым министрі жаңа әліппе А.Байтұрсынұлының әдістемесі негізінде әзірленетініне бүкіл халықты сендірді. Және бүкіл қоғам күтіп отырған жаңа «Әліппе» білім беру жүйесіне А.Байтұрсынұлының салған ізімен қайта оралады деген сенімде. Одан әрі былай өрбітті сөзін: «Биыл 400 мыңға жуық алты жасар бала мектеп табалдырығын аттамақ. Сол қоғам бақылауындағы оқулықтардың жай-күйі қалай? «Әліппе» әзірлеу жобасына қанша еңбек түсті? «Әліппе» мен «Ана тілін» кімдер және қалай жазып жатыр? Ашықтық пен бәсеке қай деңгейде? Қандай критерийлермен бағаланды? Оқулыққа тапсырыс беруші кім? Озық оқулықты анықтайтын министрлік жанынан құрылған арнайы сараптамалық комиссия қалай жасақталады? Қандай мамандардан құрылған? Бұл комиссияға баспалардың «бармақ басты, көз қысты» ықпалы жоқ па? Оқулық пен оқу-әдістемелік кешенінің жобасын әзірлеп, баспаға тапсыру жауапкершілігі неге тікелей министрліктің құзырында емес? Бұл сауалдар басынан небір сынақты өткізген білім саласында әлі күнге ашық тұр. Жалпы, «Әліппемен» қатар енгізілетін басқа да жаңа оқулықтардың дайындығы мен сапасының жай-күйі туралы ата-аналар тарапынан сұрақ көп», – деді Жанарбек Әшімжанов.
«Жалпы, «Әліппе» мен «Ана тілі» оқулықтарының тағдыры әлеуметтік желідегі қолдан ұйымдастырылған дауыстар мен бес-алты жүз адамның басқан «лайк» арқылы лайық деп танылмау керек. Жас ұрпақтың санасына сәуле құятын оқулық сапасы – бірінші кезектегі ұлттық жауапкершілік. Ел назарын аударған «Әліппе» мен «Ана тілі» оқулығының маңыздылығын ескере отырып, мына жайттарды ұсынамыз: біріншіден, озық деп танылған оқулықты арнайы Қазақстан Республикасы Үкіметінің деңгейінде кеңейтілген алқаның (кәсіби мамандар, депутаттар, қоғам қайраткерлері, ақпарат құралдарының өкілдерінен құралған) ашық талқысынан өткізу керек. Екіншіден, 1-сыныпты оқытатын мұғалімдердің кәсіби біліктілігін арттыру бағытында арнайы іс-шараларды қолға алу керек. Үшіншіден, «Әліппеден» «Ана тіліне» өтетін кезеңдегі бірізділік сабақтастығын терең игеру үшін мұғалімдерге жүйелі түрде түсіндірме жұмыстарын жүргізу қажет. Төртіншіден, базалық оқулықтарды әзірлеу, сараптамадан өткізу, басып шығару ісі, ұйымдастыру шараларын ашық өткізу құзіретінің барлығы Үкіметте немесе Білім және ғылым министрлігінде болуы керек», – деді депутат.
Шынын айту керек, депутат көтеріп отырған проблема өте өзекті. «Қазаннан қақпақ кетсе, иттен ұят қашатынын» білетін депутаттың сөзі бұл. Өйткені талай мәрте аузы күйген білім саласының, күні ертең тағы ах ұрып қалмауы үшін осы бастан қимылдаған дұрыс. Тек, Үкімет мемлекеттік тілде жолданған депутаттық сауалға түсінбей қалмаса бопты дегіміз келеді!

Нағашыбай Қабылбек

ЖАУАП ҚАЛДЫРУ

Пікіріңізді енгізіңіз!
Атыңызды енгізіңіз