Ауғанстандағы жағдай Қазақстанға қалай әсер етуі мүмкін?

«Астана» арнасы: «Отандық саясаттанушылар Ауған мемлекетінің тәліптердің қолына көшуі өзге елдерге кері әсерін тигізбей қоймайтынын мәлімдеді. Айтуларынша, Қазақстан да қауіп-қатерге ұрынуы әбден мүмкін»,— деп хабарлайды. Саясаттанушы Расул Жұмалы: «Меніңше, бұл — алаңдаушылық тудыратын жағдай. Ауғанстандағы шиеленіс, саяси тұрақсыздық әлі ұзаққа баратын түрі бар. Енді оның салдары мынау көршілес жатқан аумақтарға, оның ішінде Орталық Азияға қалай әсер етеді деу — ең алаңдаушылық туғызатын жағдай. Әсіресе, біздің мемлекетке. Енді қазір тікелей әскери шабуыл жасайды деуге болмайтын шығар. Үкімет, «Талибан», басқа саяси күштер Ауғанстанның ішіндегі мәселелерді қалпына келтірумен айналысатын шығар. Негізі басымдық осы», — десе,  саясаттанушы Ерлан Сайыров: «Босқындар тек қана Өзбекстан мен Тәжікстан ғана емес, сонымен бірге Қазақстанға да өтіп кетуі ықтимал»,— дейді.  Ұлыбританияның премьер-министрі Борис Джонсон болса: «Біз ешкімнің «Талибанды» екі жақты мойындағанын қаламаймыз. Ауғанстан қайтадан террор ошағына айналмауы үшін мүмкіндігінше барлық пікірлес адамдардың біртұтас позициясын құрғымыз келеді»,— дейді Ауғанстандағы жағдай сағат сайын құбылуда. Жақында БҰҰ-ның Қауіпсіздік кеңесі елдегі жағдайға қатысты шұғыл жиын өткізбек.