Италия Премьер-министрі Марио Драги бүгін өтіп жатқан (13 қазан) G20 ("үлкен жиырмалық") елдерінің онлайн жиналысында Ауғанстанға гуманитарлық көмек жеткізу мәселесінің мақұланғандығын айтты. Кезекті онлайн саммиттің ұйымдастырушысы Италия Республикасы. Премьер-министр өз сөзінде: «Еуроодақтың сейсенбі күні өткен жиналысында Ауғанстан босқындарына және елдегі шұғыл гуманитарлық көмекке зәру болып отырған адамдарға 1,2 миллиярд доллар көлемінде көмек беру туралы ортақ пікірге келдік. Қазір Талибан үкіметінің қатысуынсыз. Ауғанстандықтарға көмек берудің өзі қиын, егер олар біздің кіруімізді қаламаса, онда біз кірмейміз. Бұл жердегі көмек қиыншылықта отырған адамдар үшін болып отыр. Талибанмен келісу, оларды ұкіметін мойындауды білдірмейді. Біз олардың сөзіне емес, іс-әрекетіне қарап баға береміз. Өкінішке орай қазірге дейін Талибаннан ешқандай прогресті көріп тұрған жоқпыз»,- деді.
Түркия Президенті Режеп Тайып Ердоған Ұлттық арнада сөйлеген сөзінде «Талибан күткен мақсатқа жете алған жоқ»,- деді. «Біз олардың гуманитарлық көмек, қауіпсіздік, Ауғанстанды террористік ұйымдардың базасына айналуына жол бермеу және экстремизмнің алдын алу бойынша қажетті толеранттылық танытқанын көрмедік»,- деді Ердоған мырза. Қытай тарапы бұдан бұрын Ауғанстан Үкіметіне тиеселі миллиярдтаған доллар қаржыға қарата салынған санкцияны алып тастауды ұсынған еді. Алайда бұл пікірге АҚШ және Англия тарапы ешқандай жауап берген жоқ.
