Түркістан облысында ауылшаруашылығын дамытуға бағытталған ірі жобалар легі жалғасуда. Ордабасы ауданындағы Шұбарсу елді мекенінде «Ауыл аманаты» бағдарламасы аясында жылыжай кешені жүзеге асырылуда. 7,5 гектар жерді қамтитын жобаның жалпы құны 250 млн теңге. Бүгінде онда 0,18 гектарға қияр жерсіндіріліп, алғашқы агротехникалық жұмыстар жүргізіліп жатыр. Мұнда өсірілетін қияр мен қызанақ ішкі нарыққа шығарылатын болады. Ол жергілікті базарлар мен басқа да сауда орындарына жеткізіледі.
Облыс әкімі Нұралхан Көшеров аталған жылыжай кешенінің құрылысымен арнайы танысып, жауапты тұлғалармен кездесті. Ол кешен құрылысының және ауыл тұрғындарын кәсіпкерлікке тартудың маңызын атап өтті.
– Жылыжай шаруашылығы – экономикалық тұрғыдан тиімді әрі табысты сала. Мұндай жобалар ауыл тұрғындарының тұрмысын жақсартып, облыс экономикасына серпін береді. Біз кәсіп бастаймын деген азаматтарды барынша қолдауға дайынбыз, – деді облыс бсшысы.
Бұл жоба тұрғындарды жұмыспен қамту, өңір экономикасын әртараптандыру және жергілікті өнім өндірісін арттыру бағытында қызмет ететін болады. Оның жұмысына қызығушылық танытқан 30 азамат «Ырыс» микроқаржы ұйымы арқылы қаржылай қолдауға ие болды. Олардың 20-сына жалпы көлемі 167 млн теңге несие рәсімделген. Бұл өз кезегінде ауыл тұрғындарына жаңа жұмыс орындарын ашып, табыс көзін қалыптастыруға мүмкіндік береді.
Жоба аумағы 42 учаскеге бөлінген. Оның 17-сінде жылыжай құрылысы аяқталған. Осының ішінде 3 учаскеде қажетті құрал-жабдықтар орнатылып, толық іске қосуға дайын тұр.
