КТК арнасы: «Депутаттар Ішкі істер министрлігінің оффшорда тіркелген компаниямен жұмыс істегеніне үзілді-кесілді қарсы. Мәжілісмен Кеңес Абсатиров 13 бірдей облыстың Ішкі істер департаменті Кипрде тіркелген мекемеге тұрақты тапсырыс беріп келгенін айтып, іске премьердің араласуын талап етті»,— деп хабарлайды.  Мәжіліс депутаты: «Ішкі істер министрлігіне қарасты департаменттердің «Жаңа жобалар» ғылыми-техникалық орталығы» арқылы мемлекеттік тендерлерді қалай өткізгенін жіті тексеруді ұсынамыз. Әсіресе, баға саясатына мән беру керек. Құрылғылардың құны нарықтан қанша есе қымбат болды? Және мемлекеттік тендерге оффшорлық компаниялардың қатысуына тыйым салу қажет. Мәселен, Батыс Қазақстан облысының полицейлері көліктің жылдамдығын тексеретін құрылғыларды тек «Жаңа жобалар» ғылыми-техникалық орталығы» серіктестінен сатып алып отырған. Ал бұл мекеме Кипрдегі ең ірі оффшорлық аймақта тіркелген компанияның иесіне тиесілі екен. Айта кетсек, дәл осы компанияның көшедегі тіркеуіштеріне түсіп, айыппұл арқалаған жүздеген жүргізуші күні кеше шу көтерген болатын. Енді біз сақшылар мен осы орталықтың қандай байланысы барын анықтауды талап етеміз. Өйткені, шенеуніктер соңғы кезде мемлекеттік тендер арқылы оффшорлық аймақтардағы фирмаларға тапсырыс жасауды әдетке айналдырып алған. Осы жолмен қазына қаржысы шетелге шығарылып жатыр. Бұған тосқауыл қойылып, кінәлілер жазаға тартылуы керек»,—  деді.

ЖАУАП ҚАЛДЫРУ

Пікіріңізді енгізіңіз!
Атыңызды енгізіңіз