Экологияны жақсарту мақсатында өңірдегі мұнай компаниялары қала іргесіндегі құнарлы жерлерге тал егу жұмыстарын жүргізуде. Соның ішінде «NCOC» компаниясы 1 жыл ішінде 134 гектар жерге 100 мың түп тал екті.
– Біз 2 жыл бұрын тал егуді бастадық. Өзіміздің арнайы агротехникамызбен жер жыртып, суару жүйесін де заманауи бағытта жүргізудеміз. Себебі, 100 мың ағашқа 2-3 күнде айналып келу оңай емес. Оған қоса, сапалы тыңайтқыштарды қолданып отырмыз. Тал егу тобында білікті мамандар бар. Техниканың 70 пайызы автоматтандырылған, – деді «NCOC» компаниясына қарасты «Жер-Ана» мекемесінің басшысы Жұмабек Шәменов.
Ірі мұнай-газ кәсіпорындарымен жасақталған меморандум бойынша көгалдандыру жұмыстары 10 жылға дейін жалғасады. Жоба аясында «ТШО» ЖШС-не 1722,1 га, «NCOC» компаниясына 1373,5 га, «АМӨЗ» ЖШС-не 1420,9 гектар жер учаскесі бөлінді. Ал «Ембімұнайгаз» АҚ қала аумағын көгалдандырады.
Өңірлік коммуникациялар қызметінің мәліметтері бойынша дайындалды.
