2025 жылы республикалық бюджетке 730 млрд теңге көлемінде салық толық түспеген. Бұл Жоғары аудиторлық палатаның салықтық және кедендік әкімшілендіру тиімділігіне жүргізген мемлекеттік аудиті барысында анықталды.
Аудиторлардың мәліметінше, республикалық бюджетке салық түсімдерінің жоспары 4,8%-ға орындалмай, 730 млрд теңге түспеген. Негізгі себептердің бірі – салық түсімдерінің 1,3 трлн теңгеге артық жоспарлануы.
Сонымен қатар соңғы төрт жылда қосымша есептелген салықтарға қатысты даулардың жартысынан астамы салық төлеушілердің пайдасына шешілген. Бұған салық заңнамасын сақтау мен тексерулерді жүргізудегі кемшіліктер әсер еткен.
Аудит барысында электр көліктеріне арналған жеңілдіктердің гибридті көліктерге де заңсыз қолданылғаны анықталып, соның салдарынан бюджетке 70 млн теңге түспеген. Сондай-ақ 34 сыртқы экономикалық қызмет қатысушысы импорт кезіндегі ҚҚС-ты заңсыз есепке жатқызу әдісімен төлеп, бюджетке 670 млн теңгеден астам қаражат түспеген.
Жалпы аудит нәтижесінде 2,7 млрд теңге қаржылық бұзушылық, 33 рәсімдік бұзушылық және 11 жүйелі кемшілік анықталды. Жоғары аудиторлық палата анықталған мәселелер бойынша міндетті тапсырмалар мен ұсынымдар жолдап, олардың орындалуын бақылауға алды.
