Абай облысы Құрылыс нысандары – қадағалауда
Абай облысы әкімінің орынбасары Димитрий Гариков облыстық басқарма басшыларымен, «Шығысэнерготрейд» АҚ және «Семей Су Арнасы» МКК өкілдерімен бірге «Жайлы мектеп» жобасымен Шығыс кентінде салынатын 300 орындық мектептің жер учаскесін қарады.
Аралау барысында мектеп салынатын жердің геологиялық жағдайы, орналасуы, көлік қатынасының қолайлы болуы назарға алынды. Сондай-ақ, облыс әкімінің орынбасары Энергетика және ТҮКШ басқармасының басшысы Жандос Қайырхановпен бірге Қарағайлы шағын ауданындағы жаңа қазандықтың құрылыс барысын тексерді.
Жауапты тұлғаларға жұмысты жоспарға сай аяқтау тапсырылды.
Қарағанды облысы Екі айлық жарияланды
Аймақ басшысы Ермағанбет Бөлекпаев барлық тұрғындарды аулалары мен көшелерін тазарту үшін осы жұмысқа қатысуға шақырды. Өңірде абаттандыру және санитарлық тазарту бойынша екі айлық жарияланды.
– Қыстан кейін көшелерді тазалаумен айналысу керек. Аумақтарды абаттандыру және санитарлық тазалау бойынша екі айлық жариялаймын. Қалалар мен аудандардың барлық әкімдері өз елді мекендерін тазалау бойынша іс-шаралар ұйымдастыруы тиіс. Бұл жұмысқа тұрғындарды, еріктілер мен бизнес өкілдерін тартыңыздар, – деді Ермағанбет Бөлекпаев аппараттық кеңесте.
Ол «Таза Қазақстан» экологиялық акциясы жалғасатынын және бұл жұмысты күшейту қажеттігін атап өтті.
Қостанай облысы Боксшы қыздардың жүлдесі
Қостанайлық спортшы қыздар Мәскеуде өткен Софья Очигаваның жүлдесіне арналған VII халықаралық бокс турнирінде үздік нәтиже көрсетті. Турнирге 13 жастан 40 жасқа дейінгі 300-ден астам спортшы қатысты.
54 келі салмақ дәрежесінде Рамина Маханова чемпион атанды. Оны жарысқа Руслан мен Темірлан Чемурзиевтер дайындады.
Қола жүлдені жеңіп алғандар: Анэля Наурузбаева (46 кг, жаттықтырушысы – Нұрхан Жолғасбеков); Мәдина Нұрманова (66 кг, жаттықтырушысы – Темірлан Чемурзиев).
Барлық спортшы қыздар Қостанай қаласының балалар-жасөспірімдер спорт мектебінің тәрбиеленушілері.
Атырау облысы Газ-химия кешенінің қазығы қағылды
Ұлттық индустриялық мұнай-химия технопаркінде орналасқан Silleno зауытында жылына 1,25 млн тонна полиэтилен шығарылмақ. Кешеннің алғашқы қадасын қағу рәсімін облыс әкімі Серік Шәпкенов, «ҚазМұнайГаз» ҰК» АҚ басқарма төрағасы Асхат Хасенов, ҚР Энергетика вице-министрі Құдайберген Арымбек, СИБУР-дың басқарма мүшесі – атқарушы директоры Павел Ляхович және Sinopec компаниясының аға вице-президенті Ван Тао жасады.
Кешенде 20-дан астам полиэтилен маркасы өндіріледі, оның 40%-ы премиум санатында. Өнімдер ішкі нарықты қамтып қана қоймай, Еуропа, ТМД елдері, Украина, Грузия, Түрікменстан, Қытай, Оңтүстік-шығыс Азия және Түркияға экспортталады.
Бұл – Қазақстандағы ең ірі экспортқа бағытталған мұнай-газ-химия жобасы. Мұнда заманауи шетелдік технологиялар трансферті қамтамасыз етіліп, отын-химия саласының дамуына негіз болатын базалық мұнай-химия өнімі де өндіріледі.
Гауһар ТҰРСЫНҚОЖА
