Астанада интернет-алаяқтықтың жолын кесу бойынша жедел іс-шаралар барысында мыңнан астам sim-карта тәркіленді. Бұл туралы ҚР Ішкі істер министрлігінің ресми сайтында хабарланды.
«Олардың көпшілігі sim-қораптардан табылды. Бұл алаяқтарға әлемнің кез келген нүктесінен жалған нөмірлер арқылы қоңырау шалуға мүмкіндік береді. Операцияны ІІМ киберқылмысқа қарсы іс-қимыл орталығының қызметкерлері елордалық әріптестерімен бірлесіп жүргізді.
– Барлығы осындай 11 жабдық, сондай-ақ ноутбуктер, телефондар мен модемдер тәркіленді. Дыбыс күшейткіштері ретінде көрсетілген sim-қораптар жалдамалы пәтерлерден және ұсталғандардың бірінің көлігінің жүксалғышынан табылды. Сотқа дейінгі тергеп-тексеру барысында бар мән-жайлар анықталатын болады, – деді ІІМ криминалдық полиция департаментінің бастығы Қанат Нұрмағамбетов.
Елімізде интернет-алаяқтықтың құрбандары аз емес. Ресми мекемелер таратқан мәліметтерге сенсек, жыл сайын қазақстандықтардың 15 млрд теңгеге жуық қаржысы шетелде отырған интернет алаяқтарына қолды болады екен. Осы келеңсіздіктің алдын алу үшін мемлекеттік деңгейде Қазақстанның кибер қалқаны Тұжырымдамасы әзірленгені белгілі. Сонан бері қарайғы уақытта құзырлы органдар өзара сәйкесе отырып, ақпараттық қауіпсіздікті қамтамасыз ету, еліміздің киберқауіпсіздігін нығайту жолында аянбай еңбек етіп келеді.
