Алматы қаласында Көкжайлау аумағында жүзеге асырылуы жоспарланған Almaty SuperSki тау курорты жобасына қатысты қоғамдық тыңдаулар аяқталды. Бірнеше сағатқа созылған ашық форматтағы талқылау барысында қоғам белсенділері, экологтар, кәсіпкерлер, туризм саласының сарапшылары, спорт мамандары және қала тұрғындары жобаға қатысты өз көзқарастарын білдірді. Тыңдау нәтижесі бойынша қатысушылардың басым бөлігі Алматы тау кластерін дамыту бастамасын қолдап, бұл жобаның өңір экономикасы мен туризм индустриясы үшін маңызды екенін атап өтті.
Алматы – халықаралық тау туризмінің жаңа орталығы
Жоба авторларының айтуынша, Almaty SuperSki Алматыны Орталық Азиядағы ең ірі тау туризмі орталықтарының біріне айналдыруды көздейді. Қазіргі таңда әлемнің дамыған туристік аймақтары жыл бойы жұмыс істейтін тау кластерлерін дамыту арқылы экономиканы әртараптандыруға басымдық беруде. Осы тұрғыда Алматының табиғи әлеуеті ерекше бағаланып отыр. Мамандардың пікірінше, Іле Алатауының табиғи рельефі, қар жамылғысының ұзақ сақталуы және қаланың географиялық орналасуы халықаралық деңгейдегі тау курортын дамытуға толық мүмкіндік береді. Жоспар бойынша жаңа туристік аймақта шаңғы трассалары, аспалы жолдар, сервис орталықтары, қонақүйлер, демалыс орындары мен спорттық инфрақұрылым бой көтеруі мүмкін.
Жоба жүзеге асқан жағдайда Алматы тек қысқы туризм емес, жыл – он екі ай турист қабылдайтын заманауи мегаполис ретінде дамиды. Жаз мезгілінде жаяу туризм, велосипед бағыттары, экологиялық демалыс аймақтары мен халықаралық спорттық іс-шаралар өткізуге мүмкіндік туады.
Экономикаға серпін беретін ірі инвестициялық жоба
Қоғамдық тыңдау барысында жобаның экономикалық тиімділігіне ерекше назар аударылды. Спикерлердің мәліметінше, тау кластерін дамыту мыңдаған жаңа жұмыс орындарын ашуға мүмкіндік береді. Әсіресе туризм, қонақүй бизнесі, қоғамдық тамақтану, көлік, құрылыс және қызмет көрсету салаларына оң әсер күтіледі. Жоба толық іске қосылған жағдайда 15 мыңға жуық тұрақты және маусымдық жұмыс орны құрылуы ықтимал. Бұл өз кезегінде жастардың жұмыспен қамтылуына, шағын және орта бизнестің дамуына, сондай-ақ салық түсімдерінің артуына ықпал етеді. Экономистердің пікірінше, мұндай ірі туристік жобалар тек демалыс индустриясын емес, бүкіл қалалық инфрақұрылымды дамытуға әсер етеді. Қаладағы жолдар, инженерлік желілер, қоғамдық көлік пен сервис сапасының жақсаруы Алматының инвестициялық тартымдылығын арттыруы мүмкін.
Тыңдау барысында халықаралық тәжірибелер де мысалға келтірілді. Әлемдегі жетекші тау курорттары орналасқан өңірлер туризм есебінен миллиардтаған табыс тауып, жергілікті халықты тұрақты жұмыспен қамтып отыр. Сарапшылар Алматының да осындай әлеуетке ие екенін атап өтті.
Қазіргі таңда Алматыға келетін туристер саны жыл сайын артып келеді. Алайда халықаралық стандарттарға сай тау инфрақұрылымының жеткіліксіздігі туристік мүмкіндіктерді толық пайдалануға кедергі келтіруде. Осыған байланысты Almaty SuperSki жобасы өңірдің туристік бәсекеге қабілеттілігін арттыруға бағытталған маңызды қадам ретінде бағалануда.
Заманауи тау курортының пайда болуы шетелдік туристер ағынын көбейтіп қана қоймай, халықаралық жарыстар өткізуге де мүмкіндік береді. Бұл өз кезегінде Алматының әлемдік туристік картадағы орнын нығайтуға ықпал етуі мүмкін.
Жастарға жаңа мүмкіндік
Қоғамдық тыңдауда жастар мәселесі де кеңінен қозғалды. Қатысушылардың пікірінше, халықаралық деңгейдегі ірі жобалардың жүзеге асуы жастарға жаңа кәсіби бағыттар ашып, еңбек нарығындағы сұранысқа ие мамандықтардың дамуына жол ашады. Әсіресе сервис, қонақүй менеджменті, туризм, спорт индустриясы және халықаралық қызмет көрсету бағыттарында жаңа буын мамандарына сұраныс артады деген болжам айтылды. Сонымен қатар мұндай жобалар жастардың шетелге кету деңгейін төмендетуге ықпал етуі мүмкін екені де сөз болды. Халықаралық стандарттарға сәйкес келетін инфрақұрылым қалыптасқан жағдайда Алматыда туризм мен сервис саласы бойынша жаңа кәсіби мектеп қалыптасуы ықтимал.
Экологиялық қауіпсіздік – басты назарда
Тыңдау кезінде экология мәселесі негізгі тақырыптардың біріне айналды. Қоғам белсенділері мен экологтар табиғи ортаға түсетін жүктеме, құрылыс жұмыстарының әсері және биологиялық тепе-теңдікті сақтау мәселелерін көтерді. Жоба өкілдері барлық құрылыс халықаралық экологиялық стандарттарға сәйкес жүргізілетінін мәлімдеді. Сонымен қатар табиғи ландшафтқа келетін әсерді азайту үшін арнайы технологиялар мен инженерлік шешімдер қарастырылатыны айтылды. Экологиялық мониторинг пен қоғамдық бақылау тетіктері сақталатыны да ерекше атап өтілді. Сарапшылардың пікірінше, қазіргі замандағы туристік жобалар табиғатты қорғау талаптарын сақтай отырып іске асырылуы тиіс және бұл бағыттағы бақылау тұрақты түрде жүргізілуі қажет.
Тыңдау барысында түрлі пікірлер айтылды. Кейбір қоғамдық белсенділер жобаға қатысты алаңдаушылық білдіріп, табиғатты қорғау мәселесін көтерсе, жоба қолдаушылары Алматының экономикалық және туристік дамуы үшін мұндай бастамалардың маңызын атап өтті. Жиын барысында эмоциялық пікірталастар болғанымен, модераторлар барлық тараптың пікір айтуына мүмкіндік жасап, қоғамдық тыңдау белгіленген регламент аясында өтті. Мұдай ашық форматтағы кездесулер қоғам мен инвесторлар арасындағы диалогты нығайтып, жобалардың ашықтығын қамтамасыз етуге мүмкіндік береді. Қоғамдық тыңдау қорытындысы бойынша жобаға қолдау білдіріліп, ендігі кезеңде техникалық және жобалық құжаттарды әзірлеу жұмыстары жалғасатыны айтылды. Сонымен қатар мемлекеттік сараптамалар, инфрақұрылымдық дайындық және экологиялық бағалау кезең-кезеңімен жүзеге асырылмақ. Almaty SuperSki жобасы тек тау курорты ғана емес, Алматы экономикасына ұзақмерзімді серпін беретін стратегиялық инвестициялық бастама ретінде қарастырылып отыр. Жоба толық жүзеге асқан жағдайда Алматы халықаралық туризм орталықтарының қатарына қосылып, жыл бойы турист қабылдайтын заманауи мегаполис мәртебесін күшейтуі мүмкін.
Г. ТҰРЛЫБЕКОВА
