Биыл Ақтауда 50 жылдан астам уақыт бойы жаңартылмаған магистралдық жылу желілері қалпына келтірілді. Жылу және ыстық сумен үздіксіз қамтамасыз ету үшін 11,3 шақырым құбыр ауыстырылды. Бұл жұмыстарға 17 млрд теңге бөлінді. Ақтауда жылу беру маусымы 15 қазанда басталды. Бұған дейін облыс әкімдігінің телеграм-арнасында тұрғындардың жылу жоқтығына қатысты пікірлері көбейіп кеткен еді, ал қазір тұрғындар коммуналдық қызметкерлерге алғыс айтуда.
Төрт баланың анасы Тілектес Ибраева облыс орталығындағы 28-шағын ауданда тұрады. Оның айтуынша, үйге 16 қазанда жылу берілген.
«Үй жылы. Мен басқа аудандарда тұратын достарымнан сұрадым. Барлығында жылу бар. Иә, кейбір үйлерде адамдар әлі күтіп отыр, бірақ коммуналдық қызметкерлер тұрғындарды жылумен толықтай қамтамасыз ету үшін күні-түні жұмыс істеп жатыр, меніңше, бүгін-ертең жылу беріледі. Сондықтан мен қаладағы тұрғындардың бәрі жылусыз отырғаны жөніндегі ақпараттың шындыққа жанаспайтынын айтқым келеді», – деді Тілектес Ибраева.
«Мен бесінші шағын ауданда тұрамын. Біздің үйге 19 қазанда жылу келді. Бұған дейін ақаулар болды. Ол кезде апаттық бригадалардың оларды жою үшін жұмыс атқарып жатқанын бәріміз көрдік. Менің анам көрші үйде тұрады, оған жылу бізден де ерте берілді», – деді Ақтау қаласының тұрғыны Алевтина Головина.
«19-шағын ауданға жылу берілді, біз оны бір аптадай күттік. Тұрғындарға ақаулар жойылған бойда үйлеріне жылу бірден келетінін үнемі айтып отырды. Енді пәтеріміз жылы емес, қатты ыстықтан терезелерді ашып отырмыз. Коммуналдық қызметкерлерге қажырлы еңбектері үшін алғыс айтқым келеді!» – деді зейнеткер Гүлмира Исаева.
Қала әкімдігі 26 қазанға қарай әлеуметтік нысандардың 97%-ы (115-тің 112-сі) жылумен қамтамасыз етілгенін, ал қаладағы 1500 тұрғын үйдің 34-інде жылу жоқ екенін хабарлады.
«Жаз бойы негізгі жылу желілері ауыстырылды. Бұл өткен жылдардағыдай жылу мен ыстық су беруде үзіліс болмауы үшін жасалды. Желілердің әбден тозуы салдарынан жөндеу емес, толық ауыстыру туралы шешім қабылданды. Ауқымды ауыстыру қазан айында аяқталды, одан кейін гидравликалық сынақтар басталды. Осы уақытқа дейін құбырлар құрғақ болғандықтан, сынақтарды өткізу мүмкін болмады. Су берілісімен ішкі желілердің тозуы 79% болуына байланысты жарылыстар басталды. Әлеуметтік желілерде қаланы суық алып жатыр деген шағымдарды жиі естимін. Бұл дұрыс емес, өйткені үйлердің басым көпшілігі жылумен қамтамасыз етілген. Апат болған үйлерде қазіргі уақытта жедел топтар ақауларды жою жұмыстарын жүргізуде», – деп атап өтті Ақтау қаласының әкімі Әбілқайыр Байпақов.
Жылыту маусымы басталғалы шағынаудандардағы желілерде 121 жарылыс тіркеліп, оның 100-і жөнделді. Бүгінгі таңда ақауларды жою үшін 110 адам мен 49 техника жұмыс істеп жатыр. Ақтау қаласының коммуналдық қызметкерлеріне көмек ретінде Жаңаөзен қаласынан 8 бригада келді. Тұрғындардың үйлеріне жылу жеткізу үшін төтенше жағдай бригадалары күндіз-түні жұмыс істеуде. Ал қалалық кәсіпкерлер коммуналдық жұмысшыларды қолдау мақсатында ыстық шай мен бәліш ұсынып жатыр.
«Ақтауға Жаңаөзен қаласынан «Өзенмұнайсервис» компаниясының сегіз жұмыс тобы келді. Ақтаудағы құбырлар тозған, жергілікті мамандарға әр шағынаудандағы жарылған жерлерді жоюға көмектесеміз», – дейді «Өзенмұнайсервис» мекемесінің дәнекерлеушісі Қазихан Байбозов.
Маңғыстау облысы әкімдігінің Telegram-арнасы тұрғындар үшін жылумен жабдықтау желілеріндегі ақаулар мен оларды жою жұмыстары туралы ақпарат алуға арналған алаңға айналды. Тұрғындар өздерінің маңайындағы ақаулар туралы ақпаратты жедел жіберу арқылы коммуналдық қызметкерлерге көмектеседі. Кейбір тұрғындар үйде жылу берілгенін, бірақ кейбір пәтерлерде, тіпті бөлмелерде жылу жоқ екенін жеткізуде. Тұрғын үй-коммуналдық шаруашылық саласының мамандары қазір ішкі жүйелерді реттеуді қызмет көрсету ұйымдарының қызметкерлері – МИБ немесе ПӘК жүргізетінін атап өтті.
