Астана қаласында орналасқан Қазақстан Республикасының Ұлттық архивінде 22-23 қазанда «Мемлекеттік және ведомстволық архивтерді толықтыру мен мемлекеттік есепке алуды жүргізу» тақырыбында біліктілікті арттыру семинары болып өтті. 16 академиялық сағатқа жоспарланған семинарға еліміздің әр облыстарынан мамандар келіп тәжірибе алмасты.
Семинар барысында архив мекемелеріндегі қызметтің жай-жапсары таныстырылып, ондағы құжаттардың құндылығына сараптама жүргізу, мемлекеттік сақтауға тапсыру, пайдалану, ұйымның істер номенклатурасын жасау секілді жұмыстарын арнайы қағидаларға сәйкес жүргізу тәртібі таныстырылды. Оқыту семинарында ҚР Мәдениет және ақпарат министрлігі мемлекеттік саясат және нормативтік-құқықтық реттеу басқармасының басшысы С.Тащанова. «Архив ісі және құжаттарды басқару саласындағы нормативтік құқықтық актілер», «Құжатты басқаруда құжат ережелерін қолданыңыз», «Құжаттау, құжатты басқару қағидаларын қолдану», «Қызметтік пайдалануға арналған құжаттармен жұмыс жасау мәселелері» тақырыбында дәріс оқыды. Сондай-ақ ҚР Ұлттық архивінің директоры С. Нұрланова «Құжаттарды қалыптастыру – Ұлттық архив қорының сапалы кепілі» тақырыбында өзінің лекциясын оқып, көпжылдық тәжірибесімен бөлісті. Сонымен қатар ҚР Ұлттық архив қорының жинақтау бөлімінің меңгерушісі М. Нуртазина және басқа да қызметкерлері де лекция оқып, тәжірибелерімен бөлісті. Семинар соңында тәжірибе алушыларға сертификаттар тапсырылды.
Наргиза РАХАТҚЫЗЫ
