Мемлекет басшысы Қасым-Жомарт Тоқаев жыл сайынғы Жолдауында ауыл өмірін жақсарту, оның даму тетіктерін жетілдіру жайында үнемі тоқталып келеді. Сол тұрғыда Үкіметке ауылшаруашылығы саласына тың серпін беру үшін көптеген тапсырмалар жүктегені де белгілі.
Сол орайда Президент тапсырмаларының орындалу барысын, ары қарайғы мәселелерді талқылау мақсатында жақында Абай облысының орталығы Семей қаласында «AMANAT» партиясынан Абай облысы бойынша сайланған әкімдердің І облыстық форумы өтті. Бұл маңызды басқосуға облыс әкімі Нұрлан Ұранхаев, Абай облыстық мәслихатының төрағасы Қуаныш Сүлейменов, «AMANAT» партиясының аумақтық филиалдың төрағалары мен атқарушы хатшылары, бастауыш партия ұйымының төрағалары, аумақтық әйелдер қанатының кеңесшілері, студенттер мен БАҚ өкілдері қатысты.
Форум еліміздің бес аймағында «AMANAT» партиясы алғаш рет өткізіп отырған осындай жиындардың жалғасы деуге болады. Мұндай шараларды өткізу идеясы Президент Қасым-Жомарт Тоқаевтың 2020 жылғы 1 қыркүйектегі Жолдауында айтқан саяси реформалармен де тығыз байланысты. Сол кезде Мемлекет басшысы ауыл әкімдерін тікелей сайлау қажеттігін жариялап, жергілікті өзін-өзі басқаруды дамытудағы маңызына тоқталған еді. Бүгінде бұл ауылдарға жаңа мүмкіндіктер ашты.
Форумның ашылуында сөз сөйлеген облыс әкімі Нұрлан Ұранхаев ауылды жаңғыртып, әлеуметтік-экономикалық әлеуетін арттырудың маңызы зор екенін атап өтті.
«Ауыл – әр азаматқа қымбат киелі мекен, алтын бесік. Мемлекет басшысы Қасым-Жомарт Тоқаев «Ауыл – ел бесігі. Ауылдағы жағдайды жақсарта алмасақ, бәрімізге сын» екенін атап өтіп, ауылды дамыту мәселесі туралы тиісті Жарлыққа қол қойған болатын. Өткен жылы Үкіметтің қаулысымен ауылдық аумақтарды дамытудың 2023-2027 жылдарға арналған тұжырымдамасы қабылданып, нәтижелі іске асырылып келеді. Абай облысы да ауылдық елді мекендерді дамытуға бағытталған бірқатар жобалар қолға алынды. Инфрақұрылымды дамыту, әлеуметтік қызметтердің сапасын арттыру, кәсіпкерлікті қолдау мәселелерінде жүйелі шаралар қабылдануда», – деді аймақ басшысы.
Өңірлік форумда сөз алған Абай облыстық мемлекеттік сатып алу басқармасының басшысы Мақсұт Өмірханов аталған сала бойынша маңызды жайларға кеңінен тоқталды. Яғни, мемлекеттік сатып алу бағытында ұйымдастырылатын конкурстардың ашықтығы мен оңтайлылығын қамтамасыз ету, сыбайлас жемқорлық деңгейін төмендету және жергілікті атқарушы органдарға түсетін жүктемені азайту мақсатында, облыс әкімі Нұрлан Тельманұлының бастамасымен, облыстық басқармалар мен барлық аудан, қала әкімдіктері бірқатар жұмыстар атқарып жатыр.
2024 жылы арнайы ашылған веб-порталда 935 тапсырыс берушімен 278,0 млрд теңгені құрайтын 139 704 сатып алу жоспарланып, қазір жүзеге асырылу үстінде. Жыл басынан бергі 10 ай ішінде облыс бойынша 165,7 млрд теңгеге барлығы 5313 конкурс жарияланған. Бұл өткен жылдың есепті кезеңімен салыстырғанда 637-ге (1 168-дан 1 805-ке) ұлғайғанын көрсетеді.
Өздеріңізге белгілі, 2024 жылғы 1 шілдеде Мемлекет басшысы «Мемлекеттік сатып алу туралы» жаңа Заңға қол қойды. Заң 2025 жылдың 1 қаңтарынан бастап, күшіне енеді. Заңның мақсаттары – сатып алынатын тауарлардың, жұмыстардың, көрсетілетін қызметтердің сапасын арттыру, мемлекеттік сатып алу рәсімдерін оңайлату және бюрократиядан арылту, мемлекеттік сатып алу рәсімдерін одан әрі автоматтандыру, сондай-ақ сатып алудың бірыңғай платформасын құру және «Қоғамдық мониторинг» институтын қалыптастыруды көздейді, – деп атап өтті М. Өмірханов. Атап өтерлігі сол, алдағы уақытта облыстық мемлекеттік сатып алу басқармасы тарапынан жаңа заңды түсіндіру бойынша аудандарда көшпелі семинарлар ұйымдастыратын болады.
Үржар ауданы Қоңыршәулі ауылдық округінің әкімі Айдын Қожаев – бүгінгі «AMANAT» партиясы арқылы 2021 жылы сайланған ауыл әкімі. А.Қожаевтың айтуынша, ауылдық округке бүгінгі күнге дейін 11 бірлік жаңа ауылшаруашылық техникалары мен қосалқы жабдықтар сатып алынған. Ауылдағы екі мектепке, колледжге, мәдениет үйінің ғимаратына күрделі жөндеу жұмыстары жүргізілген екен. Бұл ауқымды жұмысты атқаруға бюджеттен 559,6 млн теңге қаржы жұмсалған. «Ауыл – ел бесігі» жобасы аясында құны 586 млн теңгеге жаңа спорт модулі салынғаны ауыл жастарының алдағы күнге деген сенімін нығайтты. Таскескен ауылының ішімен өтетін «Таскескен – Бақты» республикалық маңызы бар жолдың екі жағына 324 баған орнатылып, толықтай жарықтандырылған.
Партияның «Бақытты отбасы» жобасы аясында отбасы институтын нығайтуға ықпал ету мақсатында ауылдағы көпбалалы және әлеуметтік әлсіз топтағы аз қамтылған отбасыларға 9 үй, 18 пәтер пайдалануға берілді.
«Ауылдық жердің мәселелерін түбегейлі шешуді талап ететін, кезек күттірмейтін маңызды мәселелердің бірі – сумен қамту. «Таза ауызсу» бағдарламасы аясында Таскескен ауылына қарасты Үшбұлақ елді мекеніне құны 10 млн теңге модульді станция орнатылды.
«Ауылына қарап, азаматын таны» демекші, «Халыққа көмек» партиялық жобасы аясында ауыл азаматтары мен меценаттарының демеушілігімен, нақтырақ айтып өтсем болады, Талғат Сақанұлы өз қаражаты есебінен «Туған жерге тағзым» акциясы негізінде жобалардың іске асуына зор ықпал етіп, көмек көрсетіп отырғаны бәрімізді қуантады», – дейді А.Қожаев.
Курчатов қаласының әкімі Болат Абдралиев те «AMANAT» партиясы арқылы қала басшылығына сайланған азамат. Б.Абдралиев те сайланғалы бергі мерзім ішінде өзіне жүктелген жұмыстардың орындалу барысымен таныстырды.
Мәселен, 2024 жылға жоспарланған 2,0 млрд теңгенің 10 ай қорытындысы бойынша 1,9 млрд теңге құрап, 98 %-ға орындалып отыр.
Әкімнің айтуынша, Курчатов қаласының әлеуметтік-экономикалық дамуы тұрақты, жеке көрсеткіштер бойынша өсу үрдісі байқалады. Өнеркәсіп өнімін өндіру көлемі 125,9% өсу қарқынымен 1,5 млрд теңгені құрады, Ауыл шаруашылығының жалпы өнімінің көлемі 110,9 млн теңгені немесе 103,3% құрады, Бөлшек тауар айналымының көлемі өткен жылдың сәйкес кезеңімен салыстырғанда 107,4% өсіммен – 2,3 млрд теңге.
Биыл № 2 және 3 мектептерінің асханаларында, сонымен қатар басқа мектептерде де бірқатар жөндеу жұмыстары өткізілген. 2021 жылы басталған 120 орындық «Тополек» балабақшасын қайта жаңарту жұмыстары аяқталып, маусым айында ерекше балаларды оңалту орталығы ашылған. Қалалық ауруханада науқастарға бастапқы көмек көрсету сапасын жақсарту мақсатында Call Center операторлары мен тіркеу бөлімін қосымша мамандармен күшейтілген.
«Алайда, түйткілді мәселелердің бірі спортшыларды тәрбиелейтін нысандардың аздығы болған. Бұл сұрақтың да шешімі табылып, облыстық қаражат есебінен құны 1,7 миллиард теңгеге дене шынықтыру-сауықтыру кешенінің құрылысы басталды. Аула спортын дамыту мақсатында 2 спорт алаңы жөнделіп, бір шағын футбол алаңын салдық.
Жақында «Казцинк» акционерлік қоғамының демеушілігімен 150 млн теңгеге, 8 көппәтерлі тұрғын үй бойынша 4 аулаға асфальт төсеп, абаттандыру жұмыстары жүргізілді, 9 балалар ойын алаңы орнатылған. Биыл Курчатов қаласында жылыту маусымы қазан айының 2-сі күні басталды. Жылыту маусымына дайындалу мақсатында барлық қазандықтарда жөндеу жұмыстары жүргізілді, сегіз қазандық ауыстырылды. Жылу желілерінің апатты 2,5 шақырым құбырларын ауыстырдық», – дейді Б. Әбдіралиев.
Форум барысында Сыбайлас жемқорлыққа қарсы іс-қимыл агенттігінің облыс бойынша департаменті превенция басқармасының басшысы Нұржан Толыбеков, ҚР Президенті жанындағы Мемлекеттік басқару академиясы филиалының директоры Әсет Абжақов және «018.kz» ақпараттық порталдың бас редакторы Думан Кенжеғазин сөз сөйледі.
Қосымша айта кетейік, бүгінде облыста «AMANAT» партиясынан 133 әкім сайланды. Жыл басынан бері 31 ауылдық округ әкімдеріне сайлау өтті. Жыл соңына дейін тағы төрт ауданда сайлау өткізілетін болады.
