1 маусым-Халықаралық балаларды қорғау күні Сарысу ауданында ерекше тойланды.
Мемлекет басшысы – Қасым-Жомарт Тоқаев жастарға үміт артатынын, өскелең ұрпаққа жол ашу үшін барлық жағдайды жасаудың қажеттілігін атап өтіп, 2022 жылды «Балалар жылы» деп жариялаған болатын.
Биыл «Балалар жылын» аудан көлемінде жоғары деңгейде атап өту мақсатында іс-шаралар жоспары дайындалып, Жаңатас қаласы және барлық ауылдық округ әкімдері мен сала басшыларына тапсырмалар берілді.
«Балалар жылында» – Балаларды қорғау күніне ерекше назар аударылып, мәдени іс-шаралар легі толастамады.
Барлық мерекелік шараларды аудан әкімінің орынбасары Нұржан Нұралиев құттықтау сөзімен ашты.
Ауданда сағат 9.00-ден бастап бір мезгілде барлық мектептерде балалардың жазғы демалыс лагері ашылды.
Сарысу аудандық білім бөліміне қарасты Балалар-жасөспірімдер орталығы, Балалар шығармашылығы орталығы және Жаңатас қалалық аула клубтарының ұйымдастыруымен Орталық саябақта мерекелік іс-шаралар өтті.
Мәселен, Жаңатас қалалық аула клубтары мекемесі балаларға арналған «Ғажайып әлем» атты мерекелік шарада арнайы концерттік бағдарлама, қойылымдар көрсетіп, «Кім жылдам» сурет салу байқауы және «Алтын сақа», «Боулинг» ойындарын өткізді.
Ойынға және сурет салу байқауына белсене қатысқан балаларға тәттілер таратылып, мақтау қағаздары мен сыйлықтар берілді.
Балалар-жасөспірімдер орталығының «Балдәурен балалық шақ!» шарасында – концерттік бағдарлама, қойылымдар, «Кім алғыр?» атты отбасылық сайыс, «Балалар әлемді бейнелейді» атты асфальтқа сурет салу байқауы, қол күрес, гир көтеру, арқан тарту спорттық шаралары өткізілді. Сайыс және байқау жеңімпаздары ұйымдастырушылар тарапынан мақтау қағаздарымен, сыйлықтармен марапатталды.
Орталық саябақта Жаңатас қалалық өнер мектебінің фольклорлық ансамблі, домбырашылар ансамблінің өнерпаздары күні бойы өз өнерлерін көрсетті. Балалар шығармашылық орталығы балаларының қолымен жасалынған қолөнер және сурет көрмелерінің көрермендері де көп болды.
Саябақтағы қызықты репертуарлар, театрландырылған көріністер, әртүрлі аспаптарда музыкалық композициялар балаларға қуаныш сыйлады. орындалды. Балғындар үшін мұның барлығы есте қаларлық және ұмтылмас сәттердің біріне айналғаны анық.
Балалардың қуанышын еселеп, аудан кәсіпкерлері саябақта балаларға тегін балмұздақтар мен тәттілер таратып, балаларға арналған жәрмеңке ұйымдастырды.
Шара соңы аудандық мәдениет үйінде балаларға арналған «Аю, қасқыр және түлкі» ертегісінің сахналық қойылымымен аяқталды.
Осындай мерекелік іс-шаралар барлық ауылдық округтерде өткізілді.
