Таяуда Солтүстік Қазақстан облысының орталығындағы перинаталдық орталық базасында ерте араласу нысаны ашылады. Жаңа орталықта облыс әкімі Ғауез Нұрмұхамбетов болып, болашақ нысанның дайындық жағдайымен танысты. Орталықты күрделі жөндеуден өткізуге бюджеттен қаржы бөлінді, ал «Самұрық-Қазына» АҚ, «Қазақстан халқына» және «Қамқорлық» қорларының қолдауымен қажетті құрал-жабдықтар алынды.
Мұнда әртүрлі патологиясы бар 3 жасқа дейінгі балалар соңғы технологияларды қолдану арқылы оңалтудан өтеді. Орталықта оңалтуға арналған 15 төсек-орын бар. Күндізгі стационарда жыл сайын 360 бала оңалтудан өтеді.
Мамандардың айтуынша, әр баланың жеке жоспары болады. Көмекті невропатолог, реабилитолог, педиатр, невролог, эрготерапевт, психолог, емдік дене шынықтыру нұсқаушылары, дефектолог пен логопед мамандары көрсетеді.
Сонымен қатар, «Қамқорлық» бастамасы аясында облыстық балалар ауруханасында оңалту орталығын жаңғырту жоспарлануда. Жобаны жүзеге асыру ортаға ерекше қажеттіліктері бар балаларды бейімдеуге және оңалту қызметтерінің қолжетімділігін ұлғайтуға мүмкіндік береді.
