Тасқын судың салдарынан төтенше жағдай жарияланған Батыс Қазақстан облысында Жайық өзеніндегі су деңгейі қауіпті шегінен асып кетіп, тұрғындарды біраз әбігерге салды.
Күні кеше Орал қаласының іргесіндегі саяжайларда 13 мыңнан астам үй су құрсауында қалды. Облыстық төтенше жағдайлар департаменті баспасөз қызметінің 23 сәуірдегі мәліметі бойынша, 13912 адам қауіпсіз орындарға көшірілген. Он төрт эвакуациялық пунктке екі мыңнан астам адам орналастырылған. 11 мыңнан астам тұрғын өздерінің туған-туысқандарының үйін паналауда. Сонымен қатар суға кеткен саяжайлардағы үй жануарлары да қауіптен құтқарылуда. Мұндай ауқымды жұмыстарға төтеншеліктер, полиция қызметкерлері, әскерилер, еріктілер жұмылдырылғанын атап өткен жөн. Бір қуантарлығы, адам шығыны жоқ. Алайда, қыруар еңбектеніп, бар қаржыларын жұмсап тұрғызған баспаналары су астында қалған тұрғындардың көңілдеріне қаяу түскенін жасыра алмаймыз. Олармен түсінік жұмыстары жүргізілуде.
«Қазсушар» мекемесінің облыстағы филиалы берген мәліметке сүйенсек, аталған мекеменің су қоймаларына орташа толтырылуы 86%-ды немесе 435,0 млн текше метрді құрайтын су жинақталған. Су тасқыны басталғалы батыс жұртын екпінімен үрейлендірген Жайық өзеніндегі су деңгейі жалпы 7 метрге көтерілген. «Қазіргі таңда су қоймаларына су жиналуда, көлдерге, көлтабандар мен табиғи шабындықтарға су берілуде. Бүгінгі күнге Шаған және Деркөл өзендерінде орналасқан су бекеттерінен түскен тасқындық ағын шамамен 387,0 млн м3 құрайды. Пайдалану ережесіне сәйкес, Шаған су қоймасының су тастағыш имараты 2023 жылдың күзінен бастап толық ашық. Филиалдың су шаруашылығы нысандарында жағдай тұрақты» делінген филиал ұсынған хабарламада.
Күні бүгінде тілсіз жаумен күрес әлі де жалғасуда, адамдарды эвакуациялау, авариялық-құтқару жұмыстары жүргізілуде. Өзен арналарына құм-топырақ салынған қапшықтар төсеу, бөгеттер салу, су басқан аумақтарда су айдау жұмыстары белсенді түрде жүргізілуде. Облыстағы ахуал тұрақты-күрделі деңгейде, жағдай әлі қатаң бақылауда.
Ләззат ҚАЖЫМОВА
