Солтүстік Қазақстан облысында өңірге келетін дәрігерлерге арналған көтерме жәрдемақыны ұлғайту жобасы әзірленді.
Қоғамдық кеңес отырысында Денсаулық сақтау басқармасы басшысының орынбасары Нұрболат Иманжанов білікті дәрігерлердің қажеттілігіне байланысты әлеуметтік қолдау мөлшерін қайта қарау ұсынылатынын хабарлады. Атап айтқанда, қалаға жұмыс істеуге келетін жалпы практика дәрігерлеріне берілетін жәрдемақыны 1 млн теңгеге дейін, ауылға – 1,5 млн теңгеге дейін, бейінді мамандарға – 3,5 және 5 млн теңгеге дейін ұлғайту көзделмек.
2020 жылдан бастап ауылдық елді мекендерге жұмыс істеуге келгендерге 2,5 млн теңге, қалаға 1,5 млн теңге төленеді.
Нұрболат Иманжановтың айтуынша, жәрдемақы төлеу өңірге медициналық кадрларды тартуға көмектеседі. Өткен жылы 280 дәрігер, оның ішінде 95-і ауылдарға келді. Оның ішінде 167-сі 314 млн теңге көтерме жәрдемақы алды. Бұған дейін жылына 60-тан астам маман тартылған болатын.
«Облыс бойынша 183 дәрігер мен 79 орта медицина қызметкері жетіспейді. Акушер-гинекологтардың, анестезиолог-реаниматологтардың, радиологтардың, хирургтардың, балалар мамандығы дәрігерлерінің, онкологтардың, кардиологтардың ең көп тапшылығы сезілуде. Тапшылықтың негізгі себептері мамандардың өңірден тыс жерлерге қоныс аударуы, зейнеткерлікке шығуы және жеке секторға көшуі болып табылады. Кадрлық ресурстарды тарту мақсатында облыста қолайлы еңбек жағдайларын жасау және дәрігер мамандығының тартымдылығы бойынша жұмыстар жүргізілуде. Басқа өңірлер көтерме жәрдемақылар арқылы мамандарды тарту жөнінде шаралар қабылдауда. Көршілес облыстар биыл көтерме жәрдемақы көлемін 5 млн теңгеге дейін ұлғайтты», – деді қоғамдық кеңесте Нұрболат Иманжанов.
