Токиода өтіп жатқан Паралимпиадада қазақстандық дзюдошы Әнуар Сариев күміс жүлдегер атанды. Атыраулық спортшы 60 келіге дейінгі салмақта әзірбайжандық Вугар Ширинлимен татамиге шықты. Белдесу барысында алдымен В.Ширинли вазари еншіледі. Іле-шала Ә.Сариев таразы басын теңестірді. Жекпе-жек соңына таман әзірбайжандық дзюдошы тағы бір вазари еншілеп, таза жеңіп кетті. Ширек финалда Сариев моңғол спортшысы Ядамдори Сухбаатарды жеңді, ал жартылай финалда венесуэлалық Деннис Маркос Бланкодан басым түскен-ді.
Тағы бір дзюдошымыз Теміржан Дәулет 73 келі салмақта финалда өзбекстандық Феруз Саидовпен шеберлік байқасып, одан иппон әдісімен жеңіліп қалды. Теміржан жартылай финалда грузин Георгий Калданиден айласын асырып, қарсыласын иппонмен жеңген-ді. Бұл жолы бұйырғаны күміс болды, оған да шүкір десек керек. Бұл құрама қоржынына түскен үшінші жүлделі медаль.
Ал, дзюдошы қызымыз Зарина Байбатина 70 келіден астам салмақта ақтық финалда әзірбайжандық Дурсадаф Каримовамен алтын жүлдені сарапқа салды. Бұл бәсекеде әзірбайжандық балуан иппон әдісімен жеңді. Сөйтіп, Зарина күмісті қанағат тұтты.
Тағы бір қазақстандық дзюдошы Жанбота Аманжол 90 келіге дейінгі салмақта қола жүлде үшін бәсекеде франциялық Гелиос Лачуманаядан иппонмен ұтылып қалды. Күміс жүлдегерлердің бәрі мемлекет тарапынан 150 мың доллардан сыйақы алады.
