Атырау облысында «2021-2025 жылдарға арналған кәсіпкерлікті дамыту жөніндегі» ұлттық жоба шеңберінде мемлекеттік грант және 2,5 пайыздық жеңілдікпен несие алып, өз ісін ашқан кәсіпкерлер арасында көрме-жәрмеңке өтті.
– Мемлекеттік гранттар көпбалалы аналар мен АӘК алушыларға, мүгедектігі бар және оларды асыраушылар мен асыраушысынан айырылғандарға, сондай-ақ қоныс аударушылар мен қандастар санатына жататын адамдарға берілді, – деді облыстық жұмыспен қамтуды үйлестіру және әлеуметтік бағдарламалар басқармасы басшысының м.а. Еркебұлан Әбілхасымов.
Қайтарымсыз грант алған кәсіпкерлердің бірі – Айымжан Қуанышева. Ол көрмеде балаларға арналған ерекше өнімдерді ұсынды.
– Балалардың түстерді ажыратып, қол моторикасын дамыту үшін боялатын жеңіл жейделер шығардық. Онда балалардың қызығушылығын оятатын түрлі принттер бар. Олар әртүрлі бояғышпен боялып, тез жуылады, – деді А.Қуанышева.
Көрмеде 70-ке жуық кәсіпкер өз өнімдерін ал, жәрмеңкеде 50-ден астам ірі мекеме 500-ге жуық ваканттық жұмыс орнын ұсынды.
