Е.Рахмадиев атындағы Мемлекеттік академиялық филармонияда елорданың үздік еңбек әулеттері мен «Еңбек жолы», «Парыз» байқауларының жеңімпаздарын марапаттау рәсімі өтті.
Мемлекет басшысының тапсырмасымен биыл «Жұмысшы мамандықтар жылы» деп жарияланған. Бұл бастама қоғамда еңбектің және кәсібиліктің құндылығын насихаттауға бағытталған. Еңбек күніне арналған салтанатты жиында ел өмірінің негізін құрайтын, өз ісіне адал мамандар құрметке бөленді.
Сахна төрінен еңбек ардагерлерін, өндіріс озаттарын, тәжірибелі ұстаздар мен жас мамандарды Еңбек және халықты әлеуметтік қорғау министрі Светлана Жақыпова, Астана қаласы әкімінің орынбасары Ерік Мейірхан және қалалық мәслихат төрайымы Табиғат Зейнұлқабден құттықтады.
«Біздің қоғам мен мемлекет үшін ең жоғары құндылық – еңбек адамы. Министрлік жұмысшылардың қауіпсіздігін, әлеуметтік кепілдіктері мен құқықтарын қорғау бағытында көптеген бастаманы қолға алып келеді. Қазір елордада 700 мыңнан астам маман, 150 мыңнан астам еңбек ардагері бар. Бұл – өзге өңірлерге үлгі», – деді өз сөзінде министр С.Жақыпова.
Ал елордадағы бизнестің әлеуметтік жауапкершілігін қолдауға бағытталған «Парыз» байқауының жеңімпаздары «Dar rail» компаниясы мен Ақмола вагон жөндеу зауыты болды. Сонымен қатар түрлі салада еңбегімен ерекшеленген бірқатар азамат Алғыс хаттармен марапатталды.
Іс-шара барысында жоғары кәсіби біліктілігімен ерекшеленіп, өз ісіне адал еңбек ететін жұмысшыларға ерекше құрмет көрсетілді.
Салтанатты жиын әсерлі концерттік бағдарламамен аяқталып, қатысушыларға ерекше көңіл күй сыйлады.