Бұл ақша халықтың әл-ауқатын арттыруға септігін тигізері сөзсіз
Мәжіліс депутаты Ермұрат Бапи Бас прокуратурадан «ескі Қазақстан» олигархтарының халықтан ұрлаған қарызын неге қайтармай жатқанын сұрады, деп хабарлады Halyq Uni тілшісі.
Бүгін Мәжілісте «Халықтың шамадан тыс несие алуын азайту және қаржылық сауаттылықты арттыру туралы» парламенттік тыңдау өтті. Жиында депутат өзекті сұрақты қойды.
Әрине, Үкіметтің халыққа жанашырлықпен несие алма деп ақыл айтып жатқаны дұрыс. Бірақ аш адамға ақыл қонбайды. Қымбатшылық кеңірдектен қысқанда, ол адамға ақыл жүре ме?! Сондықтан мен халықтың қарызын іздеуден 2 мәселені қозғағым келеді. Бас прокуратура, сіздер «ескі Қазақстанның» халық алдындағы қарызын неге іздемейсіздер? Сауықтырамыз деп Ұлттық қордан банктерге берілген триллиондаған қарызды қайтаруды неге талап етпейсіздер? Сіздер халықтың қарызын емес, бірнеше банкті біріктіріп, қыруар сауықтыру қаржысын бір банкке жинастырып, оның барлығын сыпырып-сиырып алып кеткен назарбаевтық олигархтарға тиесілі банктердің халыққа қарызын неге іздемейсіздер? Егер сол триллиондар қайтарылатын болса, халықтың қазіргі несиелік қарызын 10-20 есе жауып тастауға болар еді, - деді Ермұрат Бапи.
Сондай-ақ ол сыртқа заңсыз шығарылған активтер Қазақстанға қалай қайтарылып жатқанын сұрды.
«Активтерді елге қайтарамыз деп заң қабылдадық. Заң қалай орындалып жатыр? Өткенде уәкілетті органның құрылғаны хабарланды. Бірақ ол хабар мардымсыз болды. Президенттің тапсырмасымен сол активтерді қайтару комитетіне 130 адам мүше болған. Қазір 30-40 адам деген ақпарат бар. Комитетте нақты қанша адам бар? Комиссияның құрамында азаматтық қоғам өкілдерінен кімдер бар?» - деді депутат.
Бас прокурордың орынбасары Жандос Өмірәлиев бұл бағытта ауқымды жұмыс жүргізіліп жатқанын айтты.
Биыл 5 қазанда мемлекет басшысының Жарлығымен комитет құрылды. Оның штаты да бар. 900 млрд-тан аса теңгенің бәрін мемлекеттің пайдасына қайтардық. Сырттан шамамен 600 млн доллар мемлекетке аударылды. Ауқымды жұмыс әлі жүргізіліп жатыр. Оның ішінде көптеген жер қайтарылды.
Әрине, комиссияның нақты құрамы бар. Оған Парламент депутаттары және қоғамдық белсенді азаматтар кірді. Олардың аты-жөнін сізге жеке беремін. Комитеттің реестріне нақты қандай тұлғалардың кіргеніне қатысты мәселе әлі жабық. Бірақ бұл жұмыс жүргізіліп жатыр. Бірақ бүгінгі регламентті сақтау үшін сізбен жеке кездесіп, мәселе бойынша толық хабар беруге дайынмын», - Ермұрат Бапи
