Дағдарыстар мен табиғи апаттар орын алған жағдайда елдер арасында гуманитарлық көмек көрсету маңызды рөл атқарады. Қиын сәттерде елдердің ынтымақтастығы мен бір-біріне көмектесуге дайын екендіктерін, ұлы адами құндылықтарын көрсетеді. Мұндай ізгі іс жасауда біздің Орталық Азия елдері, соның ішінде Өзбекстан мен Қазақстан ешқашан қарап қалған емес.
Бүгінгі таңда Қазақстанда болып жатқан табиғи апатқа байланысты Өзбекстан Республикасы Президенті Шавкат Мирзияевтың бастамасымен Қазақстан Республикасына гуманитарлық көмек жіберілді. Бұл халықтар арасындағы достықтың нышаны деп санаймыз. Сонымен қатар өзбекстандық қазақтар да қандастардың өміріне қауіп төнгеніне, инфрақұрылымдардың бұзылуына жай ғана қарап отыра алмады. Осындай уақытта зардап шеккен халыққа көмек көрсету үшін шұғыл гуманитарлық көмек көрсетуге тырысты.
Өзбекстан Қазақ ұлттық мәдени орталығының белсенділері мен өзбек блогерлері осындай игі істерді атқарғанын атап өткен орынды. Осы азаматтардың арқасында халық бірігіп, өздерінің адамилық қасиеттерін, қандай жағдайда да бауырлас әрі қандастармен бірге екенін көрсетті.
Гуманитарлық көмек арқылы Өзбек елі қазақстандықтарға кез-келген қиындықтарды жеңуде бірге екенін, жанашырлық сезімдерін жеткізді. Мемлекет басшылары Шавкат Мирзияев пен Қасым-Жомарт Тоқаевтың жуырда телефон арқылы болған диалогы да бауырлас елдер арасындағы достық қарым-қатынастың жарқын дәлелі десек артық болмас.
Айгүл ЕРКІН, журналист.
Ташкент.
