Олардың арасында алуан мамандықты игеріп, елдің қарыштап дамуына үлес қосып жүргендері де аз емес. Білім, медицина, кәсіпкерлік, спорт саласында толағай табысқа жеткен бесаспап мамандар жетерлік. Солардың бірі – БҚО Полиция департаментінің ІІ санатты автокөлік шаруашылығының полицей-жүргізушісі, полиция аға сержанты Салық Хаметов. Конституцияның құрдасы Салық Мағзомұлы ішкі істер органдарында 2018 жылдан бері қызмет етіп келеді. Өз ісіне мығым, шаруасына мұқият, көлігіне аса ұқыптылықпен қарайтын тәртіп сақшысы. Өңірде орын алған қылмыстарға жедел-тергеу тобының жол ережелерін қатаң түрде сақтай отырып, уақтылы және жедел түрде жетуін қамтамасыз ету – жас полицейдің міндетінде.
Сондай-ақ жұмыстан тыс уақытта қоғамдық бірлестік арқылы жастардың спортпен айналысуына өз септігін тигізіп келеді. Мұндай «үлкенге құрмет, кішіге ізет» қағидатымен жастар қоғамдық бірлестігін құру идеясы 2012 жылдан бастау алған. Кіші буынға көмек қолын созу мақсатында досымен бірге құрған бірлестіктің қазіргі жаңа атауы «Жебе» деп аталады екен. Осы жылдар ішінде олар өмірде өз орындарын таба алмай жүрген жас өрендерге спортқа жол ашты, өзінің өскен ауылында спорттық үйірмелердің ашылуына, оған қажетті керек-жарақтарды алуға өз қаражаттары есебінен көмектерін аямады.
С.Хаметов: – Полиция болу үшін білім де, білік те, білек те керек. Ұстамды болып, азаматтармен тіл табыса білу және сыпайы болу – басты шарт. Полиция қызметі мансап пен бақ қуғандар үшін ғажайып баспалдақ емес, әділдікті жақтап, жемқорлыққа қарсы тұру керек. Мемлекет бізге өзіміз қалаған білім мен мамандықты алуға мүмкіндік берді, енді халықтың қауіпсіздігін қамтамасыз ету, елді қорғау – біздің міндетіміз. Біз ант қабылдап, ант береміз, – дейді.
