2024 жылғы 1-17 тамыз аралығында Almaty Gallery белгілі қазақстандық суретші және дизайнер Балнұр Асанованың шығармашылығына арналған «Nomads in Time» бірегей көрмесін ұсынады. Бұл іс-шара көрермендерді таңдаулы өнер туындыларымен таныстырып қана қоймай, сонымен қатар өзінің мәдени бірегейлігін ұғыну және қайта қарастыру сияқты маңызды жалпықазақстандық үрдісті атап көрсетеді.
М.Горький айтқандай: «Өткенді білмей, бүгіннің шынайы мағынасын және болашақтың мақсатын түсіну мүмкін емес». «Nomads in Тime» көрмесі – бұл өнердің сұлулығы мен тереңдігінен ләззат алу ғана емес, сонымен қатар бұл дүниеге келудегі мақсатың, орның, түп-тамырың мен асыл мұраң туралы ойлану мүмкіндігі. Бұл атау кездейсоқ таңдалмаған: ұсынылған экспонаттар тарихи өткенмен терең байланысты көрсетеді, олардың әрқайсысы Балнұр Асанованың заманауи көзқарасымен бейнеленген көшпенділердің мәдени мұрасы туралы өзіндік оқиға.
Балнұр Асанова – Қазақстанның еңбек сіңірген қайраткері, «Сымбат» сән академиясының арт-директоры және «Сымбат» Дизайн және технология академиясының «Дизайн және сценография» кафедрасының меңгерушісі. Ол дизайн магистрі, өнертану кандидаты, «Дизайн» номинациясы бойынша Халықаралық Еуразиялық сыйлықтың Алтын лауреаты және ҚР Дизайнерлер мен суретшілер одағының мүшесі.
Оның туындылары Еуропаның, БАӘ мен АҚШ-тың көптеген елдеріндегі халықаралық көрмелер мен байқауларда ұсынылды. Балнұр Асанованың картиналары Қазақстан, Италия, Франция, Германия, АҚШ, Ұлыбритания, Швейцария, Түркия және Кореядағы жеке коллекциялар мен галереяларда орналасқан.
Көрме көрермендерге суретшінің түрлі шығармашылық тәсілдерімен танысуға мүмкіндік береді: монументалды өнердің жарқын нышандары болып табылатын монументалды гобелендерден бастап, керемет түс гаммасы мен мәнерлі стилі бар кескіндеме картиналарды көруге болады. Көрмеде ата-бабалардың өзіндік мәдениетін еске түсіретін керамика, сондай-ақ әрбір өрнегі қазақ бай дәстүрінен сыр шертетін киім топтамасы маңызды орын алады.
«Nomads in Тime» көрмесінің вернисажы 1 тамызда сағат 18:00-де Almaty Gallery-де (Достық даңғылы, 44) өтеді. Көрме дүйсенбіден басқа барлық күні сағат 11.00-ден 19.00-ге дейін ашық болады. Кіру тегін.
Баршаңызды көрмеге келіп, дәстүрлерді жандандырып, өткен мен бүгінгі күннің арасына көпір салған қазақстандық өнердің жаңа көкжиегін тамашалауға шақырамыз
