Атырау мұнай өңдеу зауытында биыл 1 қазаннан бастап ҚР өнеркәсіптік қауіпсіздік саласындағы «Азаматтық қорғау туралы» заңының талаптарына, сондай-ақ ҚР Энергетика министрлігі бекіткен жоспар-кестесіне сәйкес жоспарлы алдын алу жұмыстары жүргізіледі.
Жоспарлы алдын алу жұмыстары кезінде АМӨЗ-де технологиялық жабдықтар мен құбырлардың өнеркәсіптік қауіпсіздігін техникалық куәландыру, тексеру және сараптау жөніндегі іс-шаралар кешенін жүргізу жоспарланған.
Сондай-ақ зауыт жұмысы тоқтаған кезде реакторлық жабдықтың катализаторлары ауыстырылады. Жоспарлы алдын алу жұмыстарына 2000-нан астам қызметкер, 70-ке жуық арнайы техника жұмылдырылады.
Қазір жанар-жағармайдың тапшылығын болдырмау, ішкі нарықтағы тұрақтылықты сақтап тұру мақсатында АМӨЗ-де мұнай өнімдерінің жеткілікті қоры жинақталуда. Мұнай өнімдері ҚР Энергетика министрлігі бекіткен кестеге сай ішкі нарыққа біркелкі жөнелтілетін болады.
Айта кетейік, Павлодар мұнай-химия зауыты және Петро Қазақстан Ойл Продактс жұмысы штаттық режимде жалғасады.
