Қазақстанда тарихи сериалдар мен фильмдерге деген қызығушылық артып келеді. Соның бір дәлелі – «Golden Empire» атты деректі-драмалық сериалдың түсірілімінің басталуы. Осы жобаға дайындық барысын Nomad Stunts каскадерлік базасында бақылауға мүмкіндік туды.
Каскадерлердің қарқынды дайындығы
Nomad Stunts – әлемдік деңгейдегі жобаларда танылған кәсіби каскадерлер командасы. Олар Netflix-тің «Марко Поло», Disney-дің «Мулан», Apple Studios-тың «Наполеон» сынды алып жобаларға қатысқан. Бұл жолы да олар үлкен тарихи көріністерді дайындап, күрделі шайқастарды пысықтап жатыр. Каскадерлердің дайындығы аса қарқынды өтуде – тарихи қару қолдану әдістері, шабандоздық шеберліктер, жекпе-жек сценалары шынайы етіп дайындалуда.
Режиссер Эмре Сахинмен сұхбат
Жобаның режиссері – Эмре Сахин. Ол Netflix, National Geographic секілді халықаралық платформалармен жұмыс істеп, тарихи жобаларды түсіруде мол тәжірибе жинақтаған. Сериалдың шығармашылық бағыты туралы ол өз ойын бөлісті:
“Бұл жоба тек тарихи деректерге ғана емес, сонымен қатар көрерменге әсер ететін эмоциялық атмосфераға да негізделеді. Біз көрермендерді тарихтың тереңіне жетелеп, шынайы шайқастарды көрсету үшін ерекше тәсілдерді қолданамыз.”
Түсірілім Қазақстанда өтеді
Сериалдың ресми түсірілімі наурыз айында Қазақстанда басталады. Бұл жоба Қазақстанның тарихи мұрасын әлемге танытуға үлкен мүмкіндік береді. Жергілікті каскадерлердің, шығармашылық топтың және халықаралық деңгейдегі режиссерлердің бірлесе жұмыс істеуі жобаның сапасын жоғары деңгейге көтеретіні сөзсіз.
«Golden Empire» – тарихи жобаларға жаңа көзқарас
Тарихи жобаларға қызығушылық танытатын көрермендер үшін «Golden Empire» жаңа бір серпіліс болмақ. Сериал көрермендерді жауынгерлік рух, стратегиялық шайқастар мен тарихи тұлғалардың тағдырлары арқылы өткен дәуірге қайта алып баратын ерекше туынды болғалы тұр. Енді біз наурызды күтіп, түсірілімнің қалай өтетінін бақылауға аламыз.
