Қордай ауданының әкімі Мәден Мұсаев атқарылған жұмыстар мен өзекті мәселелер, жоспарлы жобаларға жан-жақты тоқталды.
Оның айтуынша, аудандағы елді мекендердің газбен қамтылу үлесі 83 пайыз, орталықтандырылған сумен жабдықтау жүйесі 78 пайызды құрайды. Жақсы және қанағаттанарлық жағдайдағы аудандық маңызы бар автожолдар үлесі 93,3 пайызға айналған. 2025 жылға қарай бұл көрсеткіштер 100 пайызға жетеді деп көзделуде.
Бірқатар мәселелерді шешу мақсатында 49,3 млрд. теңгені құрайтын 191 жобаны іске асыру жоспарлануда. Оның 121-і тұрғын үй және инфрақұрылым саласына тиесілі болса, 70-і әлеуметтік салаға қатысты жобалар.
Биыл түрлі бағдарламалар мен жобалар аясында қордайлық 389 отбасы баспаналы болады деп күтілуде.
Бұдан бөлек 217 инвестициялық жобаларды жүзеге асыру жоспарлануда. Оның сегізі ірі, 209-ы шағын жобалар.
Жиында ауыл шаруашылығы, білім, денсаулық, мәдениет салаларында атқарылған жұмыстар мен мәселелер көтерілді.
Облыс әкімі жоспарлағанда Мемлекет басшысының тапсырмасына сәйкес әрбір 10 000 адамға 100 жаңа жұмыс орнын құру тапсырмасы қатаң ескерілуі керектігін және ол жоспар міндетті түрде орындалуы тиіс екендігін баса айтты.
Нұржан Нұржігітов Қордайда ауқымды жұмыстар атқарылғанын атап өтіп, алайда идеология бағытындағы жұмыстарды күшейте түсудің маңыздылығына тоқталды.
Аймақ басшысы әр отбасының ай сайынға тұрақты табысы болу, мемлекеттік бағдарламалардың мүмкіндігін ұтымды пайдалану қажеттігін жеткізді. Әсіресе, осы орайда ауылдық округ әкімдеріне үлкен жауапкершілік артылатынына назар аудартты.
Кеңес барысында бірқатар мәселер бойынша аудандық бөлім басшылары мен ауыл әкімдерінен жауаптар алынып, тиісті тұлғаларға нақты тапсырмалар жүктелді.
