Атаулы мерекені әсіресе балалар асыға күтеді. Өйткені, жыл сайын балаларға арналған Жаңа жылдық мерекелік шыршалар ұйымдастырылып, түрлі тәттілер салынған сыйлықтар үйлестіріледі.
Осыған орай бүгін оңалту орталығындағы әр түрлі жастағы ерекше балаларға жаңа жылдық мерекелік кеш ұйымдастырылды.
Шараға аудан әкімі Сәкен Мамытов арнайы қатысып, балаларды және орталық ұжымын Жаңа жыл мерекесімен құттықтады.
«Бұл өмірде сіздердің жүздеріңізден нұр шашып, бар ықыластарыңызбен риза болғандарыңызды көруден асқан бақыт жоқ. Бүгін байтақ еліміздің барлық өңірлерінде өздеріңіздей өнегелі балалар Жаңа жылдық шыршаның айналасына жиналып, мерекені көтеріңкі көңіл-күймен қарсы алуда. Сондықтан да, осынау шырша мерекесі естеріңде қалатын ерекше кеш болады деп сенемін» - ізгі тілектерін жеткізді.
Аудан әкімі Сәкен Үмбетұлы оңалту орталығына өз атынан сый-сыяпат тарту етіп, балаларға сыйлықтар табыстады.
Сондай-ақ, бірқатар ауданның белсенді кәсіпкерлері де балаларға тәтті сыйлықтар табыс етті.
Қызықты да қуанышқа толы мерекелік шарада балалар да тақпақ, әндер айтып, би билеп өз өнерлерін көрсетті. Аудан өнерпаздары әннен шашу шашты. Аяз ата, Ақшақар, Мұз ханшайымы және өзге де ертегі кейіпкерлері қойылымдар қойып, жиналғандарға жаңа жылдық көңіл күй сыйлады.
