Мәншүк Мәметова атындағы Орал әуежайы өз жолаушыларына қолайлы жағдай жасау бағытындағы жұмыстарын жалғастыруда. Бұл жолы әуежайдың автопаркі жолаушыларға қызмет көрсететін екі жаңа автобуспен толықты.
Бұл туралы Орал әуежайының баспасөз қызметінің басшысы Айнагүл Сакпусунова хабарлады. Айтуынша, екі автобустың біреу 110 адамға арналған «Yutong» маркалы төмен едендік автобус болса, екіншісі – 13 адамдық «Toyota Hiace» шағын автобусы.
«Yutong» автобусының салоны кең, екі жағынан шығатын алты жұп есігі, оқшауланған жүргізуші кабинасы, кондиционерлері бар және тұтқалары жеткілікті. Ұзындығы шамамен 14 метр, ені 3 метр болатын автобуста мүмкіндігі шектеулі жолаушыларға ыңғайлы болу үшін жиналмалы пандус және сырғанап кетуден сақтайтын еден жабыны қарастырылған.
Ал өте ыңғайлы «Toyota Hiace» шағын автобусы жолаушыларды қорғауды қамтамасыз ететін белсенді және пассивті қауіпсіздік жүйесімен жабдықталған. Салонда қолайлы температура мен ылғалдылық сақталады.
Баспасөз қызметі хабарлағандай, өткен жылы әуежайдың арнайы техника паркі айтарлықтай жаңартылып, жабық басқыштар, мұзға қарсы сұйық реагентті шашатын тіркемелі үлестіргіш, құрамдастырылған жол машинасы, фронтальды тиегіш, өрт сөндіру машинасы, BOSCHUNG аэродромдық машиналары және басқа механикаландыру құралдары сатып алынған. Қазіргі уақытта Орал әуежайында барлығы 70-тен астам арнайы көлік және механикаландырылған жабдық пайдаланылуда. Арнайы техниканы жаңарту бағдарламасы әлі жалғасатыны мәлім болды.
Ләззат ҚАЖЫМОВА,
БҚО Орал қаласы
