Күннен-күнге түрленіп жатқан Түркістанға төрткүл дүние көз тігіп отырғаны жасырын емес. Түркі елдерінің рухани астанасы ретінде мәртебесіне сай шаһар болып қалыптасуы жолында жасалып жатқан игі істер қарқын алып, бүгінгі Түркістан алып құрылыс алаңына айналған. Десек те түркістандықтар той тойлап, көңіл көтеруге де уақыт табатын халық. Оның үстіне қала күнін атап өту үрдісінен жаңылуға болмайды.
Қала күніне орай Түркістанда бірталай мерекелік іс-шара жоспарланған. Соның бірі Жеңіс саябағында өтті. Қала әкімі Нұрбол Тұрашбеков түркістандықтарды қала күнімен құттықтап, облыс орталығына сай мәдениет пен тұрмыс салтын қалыптастыруда аянбай тер төгуге шақырды. Ұйымдастырылған шараға шаһар басшысымен қатар, қалаға еңбегі сіңген түрлі сала өкілдері қатысты.
Салтанатты шараның сәнін түрлі сала үздіктерін марапаттау рәсімі ашты. Індет уақытында қала қауіпсіздігі үшін аянбай еңбек еткен денсаулық сақтау, құқық қорғау, төтенше жағдай қызметі және әкімдік қызметкерлеріне құрмет көрсетілді. Бірқатар азаматтарға «Қалаға сіңірген ерен еңбегі үшін» төсбелгілері тағылып, Алғыс хат пен сыйлықтар табысталды. Одан бөлек, Түркістан облысы ақсақалдар алқасы төрағасы мен Түркістан қаласы ардагерлер кеңесінің төрағасы сөз сөйлеп, «Түркістан қаласының құрметті ақсақалы» төсбелгі иегерлерін марапаттады.
Қала күні мерекесіне орай жоспарланған мәдени-рухани іс-шаралардың тағы бір парасы – «ПарақTimes» кітап жәрмеңкесі болды. Бұл игі бастама Түркістан қаласы әкімдігі мен «Серпіліс» қоғамдық қорының ұйымдастыруымен жүзеге асты. Кітап көрме жәрмеңкесінің ашылу салтанатына Түркістан облысы әкімінің орынбасары Сәкен Қалқаманов, Түркістан қаласының әкімі Нұрбол Тұрашбеков қатысып, жұртшылықты мерекемен құттықтады.
Жәрмеңкеде Нұр-Сұлтан, Алматы, Қарағанды, Шымкент қалаларының баспа үйлері, кітап дүкендері, кітапханалары оқырмандарға кітаптарын ұсынды. Еліміздің түкпір-түкпірінен келген ақын-жазушылар, жас қаламгерлер түркістандық оқырманмен жүздесті. Атап айтсақ, Ерлан Жүніс, Серікбол Хасан, Есболат Айдабосын, Айдар Сейдәзым, Абай Қалшабек, Мұқағали Кенжетайұлы және өзге де ақын-жазушылар шығармаларынан шашу шашты. Басты ұйымдастырушының бірі Бейсенкүл Нарымбетова оқу мәдениетін жоғалтуға болмайтынын айтып, іс-шараның маңыздылығына тоқталды. Осы жәрмеңкеде Сейдалы Дүйсебайұлының «Таңғажайып Түркістан» және Мадина Айтпенбетованың «Сайрамнан Түркістанға дейін» атты жолжазба-кітаптары таныстырылды.
Көрмеде «Қазақ энциклопедиясы», «Қызмет», «Отбасы хрестоматиясы», «Шашу», «KHAN COMICS», «Қазбілім», «Шың» «Shugylakitap» баспа үйлері мен Түркістан облысындағы кітапханалардың кітаптары жұртшылыққа ұсынылды. Жәрмеңке қорытындысында «Қазақ энциклопедиясы», «Қызмет», «Отбасы хрестоматиясы», «Шашу», «KHAN COMICS», «Қазбілім», «Шың» «Shygylakitap» баспа үйлері, «КітапALL», «Qazyna» кітап дүкендері мен Ы.Алтынсарин атындағы Түркістан облыстық балалар кітапханасы және Фараб кітапханасы арнайы Алғыс хатпен марапатталды.
Сонымен бірге қала күні мерекесіне орай Түркістандағы этноауылда қолөнер шеберлерінің көрмесі өтсе, «Жеңіс» саябағында мерекелік концерт, спорттық сайыстар ұйымдастырылды.
