Қазір қай ауылды алсаң да оның шетте, қалаларда миллиондаған перзенттерінің бар екенін жақсы білеміз. Тоқсаныншы жылдардағы жаппай жекешелендіру НӘН-нің пәрменімен таратылып, тоналған ауылдардың тұрғындары жаппай қалаларға күнкөрістің қамымен ағылғанын сіздер жақсы білесіздер. Сол жерлерге барып қоныстанып, тамыр жайды. Бірақ олар туған жер, алтын бесік ауылдарын ұмытқан жоқ. Әрдайым еске алып, қолдары қалт еткенде ауылдарына барып, топырағына, құмына аунап-қунап, сағыныштарын басатын. Қалтасы қалыңдары өзінің оқыған мектептеріне немесе ауылдарына қажетті нәрселерді салып беріп отырды. Мәселен Қызылорда облысы Жалағаш ауданының Темірбек Жүргенов ауылына Қаһарман Бабағұлов ағамыз мешіт салып берді. Аққыр деген ауылымызға да Алланың үйін асқақтатқан Табынбайдың ұрпақтарына, бауырларымызға да сауабын бергей. Мұндай жарқын мысалдар жетерлік.
Сағыныш! Осы бір жүрегіңнің қылын шертетін тамаша сезім біздің қазақта ғана ерекше дамыған. Жоғарыда айтқанымыздай, олар тек ауылдарын сағынбайды. Ауылдастар бір-бірін іздейді, сағынады. Сыр елінің ауылдарына жақсы бір дәстүр қалыптасқан. Ол жыл сайын көгілдір көктемде, яғни мамыр айында «Аруақтар күнін» өткізуі.
Белгіленген бір күнге жиналып, жан-жақтан келген ауылдастар алдымен қорым, қабірлерге барып, құран бағыштайды, ас береді. Содан соң бір-бірімен қауышып, сағыныштарын басып, арқа-жарқа әңгіме тиектерін ағытады, өткен күндерін еске алады. Біздіңше, бұл өзге өңірлер де үйренетін, тағылым алатын жақсы өнеге, тамаша дәстүр.
Алматы қаласында тұратын біздің Сыр елінің азаматтары – ауылдастардың соңғы он шақты жылда қалыптастырып келе жатқан тағы бір әдемі, әсем дәстүрі бар. Ол – өзіміздің төл жаңа жылымыз Наурызда бас қосып, оны атап өту. Жалағаш ауданының аумағында Мәдениет, Темірбек Жүргенов атындағы, Жаңаталап және Аққыр деген ауылдар бар. Төрт ауылдың тұрғындары бір-бірімен бұрыннан етене араласып келеді. Осы ауылдардың Алматыда тұратын байырғы тұрғындары «Ауылдастар» деген топ ашып, үнемі хабарласып тұрады. Қуаныш, қайғы болсын бірге болады. Биыл да мінеки бірнеше жылғы үзілістен кейін қайта бас қосып отырмыз. Біздіңше, бұл да өзгелерге үлгі болатын жақсы дәстүр. Осы төрт ауылда небір мықты мен жайсаңдар, атақтылар өмірге келген. Оларды бөле-жара айтпай-ақ қоялық.
Қадірлі ауылдастар! Төл жаңа жылымыз құтты болсын. Әр отбасыға, әрбір ауылын сағынып жүректері лүпіл қаққан аяулы жандар, бауырлар осылай бірімізбен қауышып тұруды Аллам әрқашан нәсіп етсін! Ауылымыз, алтын бесігіміз аман болып, шаңырағы биіктей берсін!
Ертай АЙҒАЛИҰЛЫ
