Қадірлі әріптестер! Мерейтойларыңыз құтты болсын!
Еліміз тәуелсіздігін жариялағаннан кейін іле-шала, нақтырақ айтсақ, бір ай бір күннен кейін дүниеге келген «Qazaqstan dauiri» газеті міне, бүгін 30 жасқа толып отыр.
Бұл үлкен қуаныш, мерейлі мереке. Егемен елімізбен қатар жасасып келе жатқан бұл басылымда қазақтың небір қабырғалы ақын-жазушылары, қаламы жүйрік журналистері еңбек етті. Бұл газет қаншама таланттың белін буып, қаламын ұштап, шығармашылықтың биік шыңдарына жетеледі. Яғни, осы басылымнан қаншама мықтылар өсіп-өніп шықты. Міне, Қалтай Мұхамеджанов, Марат Тоқашбаев, Жұмабай Шаштайұлы сынды қаламгерлердің әр жылдары осы басылымға басшылық етуі «Qazaqstan dauiri» газетінің іргетасы о бастан мықты қаланып, қабырғасы берік болғанын байқатса керек.
Бүгінде белгілі қаламгер, ел анасы атанған Сәуле Мешітбайқызының зор ізденісі, тынымсыз еңбегінің арқасында бұл басылымдар төрдегі орнынан төмендеген жоқ. Оқырмандардың сүйікті басылымына айналған.
Қазақ баласының біршама толқыны «Мөлдір бұлақ» журналымен бірге өсті. Ұлтымыздың қаншама ұланы «Мөлдір бұлақ» арқылы тәрбиеленді. Бұл журнал тілші боламын деген талапты жастың ең бірінші аяқ тірер баспалдағына айналды. «Мөлдір бұлақты» оқып өскен ұрпақтың бойында ар-ұят, иман, абырой, отаншылдық қасиеттер мәңгілікке қалыптасып, адал еңбек етудің қыр-сырын түйсініп өсті.
Арада қаншама уақыт өтіп, заман ауысып, жүйе өзгеріп жатса да, «Qazaqstan dauiri» өз ұстанымынан айныған емес. «Мөлдір бұлақ» Алаш баласының ақылманы, панасы, қорғанышы болып отыр.
Ендеше, бұл торқалы той бүкіл оқырманның, қалам ұстаған ағайындардың ортақ мерекесі. Қуаныш қуанышқа ұлассын, ағайын!
