Орал қаласының əкімі Миржан Сатқановтың қала тұрғындарымен кездесулері жалғасуда. Бұл туралы қала әкімдігінің баспасөз қызметі мәлімдеді.
Шаһар басшысы Миржан Мұнайдарұлының кезекті тұрғындармен кездесуі қаладағы «Достық үйі» ғимаратында өтті. Сұрақ-жауап форматында өткен жиында оралдықтардың басым көпшілігінің сауалы әлеуметтік мәселелерге қатысты болды. Қала әкімі М.Сатқанов кездесуге келген тұрғындардың сұрақтарына нақты жауап беріп, тұрғын үй, құрылыс, коммуналдық салалар бойынша тиісті бөлім басшыларына нақты тапсырмалар берді.
«Жиын соңында алдағы уақытта тұрғындармен бетпе-бет тұрақты кездесіп тұратынын айтқан шаһар басшысы мұндай кездесулер халықтың қажеттіліктерін ескеруге себепкер болатынын және шаһардың дамуына оң ықпал ететінін жеткізді. Кездесуден кейін қала басшысы тұрғындарды жеке мәселелері бойынша қабылдады», – деп мәлімдеді баспасөз қызметі.
Сонымен қатар Орал қаласының әкімі Миржан Мұнайдарұлы өзінің әлеуметтік желідегі парақшасында жазба қалдырып, шаһардың бірқатар аудандары және саяжай тұрғындарымен «ашық микрофон» форматында жүздескенін жеткізді.
