Мұндай электронды бақылау құралдары Орал қаласында сот шешімімен бас бостандығынан шектеу ретінде жаза тағайындалған пробация қызметінің есебінде тұрған сотталғандарға, сондай-ақ шартты түрде сотталғандарға қолданылатын болады.
Есептегі тұлғалар күнделікті істерімен шектеусіз айналыса береді. Оған жазаның бүкіл мерзімі ішінде тағылатын білезік қайталанған қылмыс жасаудың және қоғамдық тәртіпті бұзудың алдын алуға бағытталған. Айталық, Орал қаласындағы пробация қызметінің есебінде тұрған, яғни бас бостандығынан шектеуге сотталғaн пробациялық бақылаудағы бір азамат бір ғана әкімшілік құқық бұзушылық жасады (ҚР ӘҚБтК-нің 440-бабы 1-бөлігі бойынша). Осылайша ол жазасын «бас бостандығынан айыруға ауыстыру туралы» ескерту алды. Сотталған адамның жаза мерзімі – 3 жыл. Егер ол екінші рет бұзушылық жасаса, бас бостандығынан айыру түріндегі нақты мерзім алады. Сотталушының ойынша, бұл әдістің тиімді жағы да бар. «Өйткені қандай да бір құқық бұзушылықтардың алдын алады және әкімшілік аумақтан шығып кетпеуге болмайтынын ескертеді» дейді ол.
– Бұл электрондық бақылау құрылғысы – пробациялық бақылауда тұрған сотталғандар үшін сот жүктеген міндеттерді қатаң сақтауға, түнгі уақытта тұрғылықты жерінен кетпеуге, пробация қызметіне хабарламай әкімшілік-аумақтық бірліктің шегінен шықпауға, қандай да бір құқық бұзушылықтар жасамауға, алкогольді ішімдіктер ішетін не сататын қоғамдық орындарға бармауын қадағалап отыруға септігін тигізетін құрылғы деп есептейміз, – дейді БҚО бойынша ҚАЖД Орал қалалық пробация қызметінің аға инспекторы, әділет капитаны Азамат Иманғалиев.
