Дүниежүзілік қоршаған ортаны қорғау күні мен Экологтар күніне орай, Тараз шаһарында «Таза Қазақстан» республикалық экологиялық бағдарламасы аясында ауқымды жалпықалалық сенбілік ұйымдастырылды. Шаһардың экологиялық мәдениетін көтеріп, тазалығын сақтауды көздеген бұл игі бастамаға жергілікті тұрғындар, мемлекеттік қызметшілер, түрлі мекемелер мен кәсіпорын ұжымдары, белсенді жастар ұйымдары және еріктілер бір кісідей атсалысты. Сүйікті қаласының көркейіп-гүлденуіне үлес қосуды парыз санаған тараздықтар тазалық жұмыстарына аса белсенділікпен кірісті.
Тазалық акциясының негізгі ошағы ретінде «Талас» шағынауданы мен қаланың бірқатар белгіленген стратегиялық аумақтары таңдалып алынып, онда кешенді санитарлық жұмыстар жүргізілді. Ортақ іске жұмылған жұртшылық көшелер мен жаяу жүргіншілер жолдарын, халық көп жиналатын қоғамдық орындарды, демалыс саябақтары мен жасыл желектерді тұрмыстық қалдықтардан, шашылған қоқыстардан толықтай тазартты. Нәтижесінде, айнала ретке келтіріліп, қаланың көркіне көрік қосылды.
Ауқымды экологиялық шараға жалпы саны 250-ге жуық адам қатысып, олардың қажырлы еңбегінің арқасында қала аумағынан 28 текше метр қоқыс арнайы полигондарға шығарылды. Мұнымен қоса, шаһарды абаттандыру және тұрғындардың қауіпсіздігін қамтамасыз ету мақсатында, құлау қаупі бар 18 қураған ағаш анықталып, оларға санитарлық кесу жұмыстары жүргізілді. Осындай жүйелі шаралар қала тұрғындарының табиғатқа деген жанашырлығы мен жауапкершілігін арттыратыны сөзсіз. Тәртіп пен тазалықты ту еткен Тараз қаласында бұл бағыттағы абаттандыру жұмыстары алдағы уақытта да өзінің тұрақты жалғасын таппақ.
