Мемлекет басшысының «Әкімдердің халықпен кездесулерін өткізу туралы» Жарлығына сәйкес Жамбыл облысының әкімі Ербол Қарашөкеев Сарысу ауданына жұмыс сапарымен барып, жұртшылықпен жүздесті.
Алдымен Ербол Қарашөкеев халықты облыста атқарылып жатқан жұмыстар туралы хабардар етті.
Бұдаң соң Сәкен Мамытов сөз алып, ауданның әлеуметтік-экономикалық даму көрсеткіштері мен облыс әкімі жүктеген тапсырмалардың орындалу барысын баяндады.
Аудан әкімінің орынбасары Ерлан Ермағанбетов, ауыл шаруашылығы бөлімінің басшысы Нұрлан Молдабеков, ветеринария бөлімінің басшысы Ақылбек Оспанов жауапты салалары бойынша есеп беріп, сұрақтарға жауап берді.
– Балалар қауіпсіздігі – бәрінен маңызды. Өскелең ұрпаққа тағылымды тәрбие мен озық білім беруде ата-ана мен ұстаздар қауымына зор жауапкершілік жүктеледі. Бірақ, баланың тәрбиесіне бірінші кезекте ата-ана жауапты екенін естен шығармаған жөн. Бала – болашағымыздың шамшырағы! Сондықтан бар ауыртпалықты ұстаздарға жүктеудің қажеті жоқ деп санаймын, – деген облыс әкімі бала – ата-ана – ұстаз арасында тығыз байланыс орнатудың маңыздылығын жеткізді.
Аймақ басшысы аудан орталығы – Жаңатасты дамытуға ден қойып, қала әкімі Ильяс Домалақовтың өзекті мәселелерді шешу бойынша жоспарын тыңдады.
– Халық сізді әкім етіп сайлап, қаланы басқаруды сеніп тапсырды. Тұрғындардың тұрмыс-тіршілігін жақсарту, өзекті мәселелерді шешу – өте маңызды. Жылыту маусымы жоспарға сәйкес жүргізілуі тиіс. Ендеше, жұмысты жандандырыңыз, – деді Ербол Қарашөкеев Жаңатас қаласының әкіміне қарата.
Облыс әкімі жол-көлік оқиғаларының жиілегеніне алаңдаушылық білдіріп, ережені елемеген азаматтарға заң аясында қатаң шараларды қабылдауды талап етті.
Бұдан бөлек, аудандық аурухана жұмысына тұрғындардың наразылығы барын айта келе, бас дәрігерге қызмет көрсету сапасын арттыруды міндеттеді.
Кездесу сұрақ-жауап форматында жалғасып, азаматтар бірқатар мәселе көтерді. Атап айтқанда, аурухана құрылысын жүргізу, білім беру ошақтарын автобуспен қамту, өндірілген өнімді өткізу, ағын су мәселесі мен өзге де өтініш-тілектерін жеткізді.
Ал, зейнеткер Сейітқадыр Әбдіхалықұлы жастарға жұмыс орнын ашу мәселесіне көңіл бөлуді сұрап, ойларымен бөлісті.
– Инвестициялық қоржынымызда 4 мыңнан аса жұмыс орнын құруға мүмкіндік беретін 80 жоба бар. Инвесторлармен кездесу барысында өндіріске жергілікті тұрғындарды, оның ішінде жастарды жұмысқа тартуды алға тартамыз. Жыл басынан бері 19 жоба іске асып, 674 жаңа жұмыс орны құрылды. Олардың басым бөлігіне өзіміздің жамбылдық тұрғындар орналасты, – деп облыс әкімі ақсақалдың сұрағына жауап берді. Инвестиция тарту – өңір экономикасы үшін маңызды мәселе екеніне назар аударды.
Ербол Қарашөкеев сөзін қорытындылай келе, аудан әкімдігіне мемлекеттік қолдау шараларын кеңінен насихаттап, тұрғындардың тұрмыс сапасын жақсарту, табысын артыру бойынша нақты міндеттер жүктеді.
Кездесуден соң облыс әкімінің жеке қабылдауы өтіп, сарысулық азаматтардың өтініш-тілектері қаралды.
Айта кетейік, 9 айда өңірдің барлық деңгейдегі әкімдері дәл осындай форматтағы 550 кездесу өткізді. Басқосуларда 2 125 мәселе көтерілген, оның 1 457-сі орындалып, 668-і бақылауға алынды.
