Оралда 12 наурыз күні «Ашық әкімдік» іс-шарасы өтті. Әлемді жайлаған індеттің салдарынан тұрғындарға жергілікті билік өкілдеріне көптеген сауалдарын тікелей жолдау қиындық тудырғаны жасырын емес. Сондықтан оффлайн форматта ұйымдастырылған бұл шараның жерлестеріміз үшін маңызы зор болды.
Орал қаласы әкімдігінің баспасөз қызметі берген мәліметке сүйенсек, «Ашық әкімдік» шарасы аясында қала әкімі Абат Шыныбеков пен оның орынбасарлары, қала әкімдігі құрылымдық бөлімдерінің басшылары, қала прокуроры мен полиция басқармасының бастығы азаматтарды жеке мәселелерімен қабылдады. Жалпы қабылдауға 130-дан астам оралдық азамат тұрғын үй, жер, әлеуметтік жағдайлар, бизнесті дамыту, тұрғын үй-коммуналдық шаруашылығы, жолаушылар тасымалы сынды мәселелермен жүгінді. Негізінен көптеген адамдарды баспана мәселесі толғандыратыны белгілі болды.
Қала басшысы Абат Абайұлы атап өткендей, облыс орталығында жыл сайын мемлекеттік бағдарламалар арқылы көпқабатты тұрғын үйлер салынып, оның бір бөлігі кезекте тұрған азаматтарға берілуде. Соңғы 3 жылда шаһарымызда әртүрлі санаттағы тұрғындарға 828 пәтер берілген. Қазіргі таңда азаматтарға үй сатып алу мақсатында өздерінің зейнетақы жинақтарының бір бөлігін «Отбасы банкіндегі» депозиттерге салу мүмкіндігі қарастырылған. Сонымен қатар биылдан бастап кейбір санаттар бойынша кезектегі азаматтар үшін тұрғын үй төлемінің бір бөлігі субсидияланатын болады.
«Ашық әкімдік» барысында бірқатар мәселелер өз шешімін тапса, кейбір мәселелер бойынша заң аясында түсіндірме жұмыстары жүргізілді.
