Бүгін Түркістан облысында жаңа әкім сайлауы өтті. Мемлекет басшысының тапсырмасы бойынша ҚР Премьер-министрі Әлихан Смайылов пен ҚР Президенті Әкімшілігінің Басшысы Мұрат Нұртілеу Түркістан қаласына келіп, Түркістан облысының барлық деңгейдегі мәслихат депутаттарының жиналысына қатысты. Түркістан облысы мәслихаты депутаттарының бұл жолғы бірлескен сессиясына 286 депутат қатысты. Әлихан Смайылов депутаттарға ҚР Президентінің Түркістан облысының әкімі қызметіне Ұласбек Сәдібеков пен Дархан Сатыбалдының кандидатураларын қарауға енгізу туралы хатын оқып берді.
Ұласбек Сәдібеков облыс әкімінің орынбасары, ҚР Мәжіліс депутаты болған. Қазір Сайрам ауданының әкімі. Дархан Сатыбалды Шымкент қаласының әкімі, Оңтүстік Қазақстан облысы әкімінің бірінші орынбасары, Сенат депутаты қызметтерін атқарған. Бүгінге дейін Қазақстанның Өзбекстандағы елшісі болды.
Әкім таңдау жиынында депутаттар дауыс беруді ашық түрде жүргізу туралы шешім қабылдады. Кандидаттар өздерінің бағдарламаларын таныстырды. Естеріңізге сала кетсек, 24 тамыз күні облыс әкімі Өмірзақ Шөкеев өз еркімен жұмыстан кету туралы өтініш берген. Ел Президенті бұл шешімді қабыл алды. Ал әкімдікке ұсынылған қос кандидаттың да мемлекеттік қызметте тәжірибесі мол. Десе де облыстық мәслихаттың 200 депутаты Дархан Сатыбалдының кандидатурасын қолдаса, 86-сы Ұласбек Сәдібековке дауыс берген. Басым дауыспен Дархан Сатыбалды Түркістан облысының әкімі болып танылды. Бұл туралы Үкімет басшысы Ә.Смайылов Президентке хабарлап, тағайындау туралы Жарлыққа қол қойылатынын айтты.
Сессиядан кейін облыс активінің отырысы өтті. Жиында Әлихан Смайылов ҚР Президенті Қасым-Жомарт Тоқаевтың Жарлығын оқып берді. Президент Жарлығымен Түркістан облысының әкімі болып Сатыбалды Дархан Амангелдіұлы тағайындалды. Ел Президенті Қ.Тоқаев Шөкеев Өмірзақ Естайұлына аймақ басшысы қызметіндегі көп жылғы жұмысы үшін алғысын айтты. Айта кетейік, жаңадан тағайындалған облыс әкімі Дархан Сатыбалды 1974 жылы Сарыағаш ауданында туған. С.Сейфуллин атындағы Ақмола ауылшаруашылық институтын, Қазақ гуманитарлық-заң университетін бітірген. Мамандықтары: экономист-менеджер, заңгер.
