Жақында түркиялық ресми дереккөздер республикадағы халық санының 85 миллион 664 мың 944 адамға жеткендігін хабарлады. Бұл мәлімет 2024 жылы 31 желтоқсандағы көрсеткіштерге негізделген. Нақтырақ айтсақ, ерлер саны 42 миллион 853 мың 110, әйелдер саны 42 миллион 811 мың 834-ке жеткен. Яғни жалпы халықтың 50,02 пайызын ерлер, 49,98 пайызын әйелдер құраған.
Сонау 1923 жылы Түркия Республикасы құрылған шақта бұл елде 13 миллионнан астам адам болған. Олардың шамамен 75%-ы ауылдарда тұрған. Елдегі соғыс пен саяси тұрақсыздықтың салдарынан халықтың басым бөлігін балалар, әйелдер мен қарттар құраған екен. Сонан бергі бір ғасырда бауырлас Түркия елі дамудың даңғыл жолынан тайған жоқ. Қазіргі 85 миллион адамның 80 пайыздан астамы түріктер болса, елдегі екінші ұлт саналатын күрдтердің үлесі 15 пайызға жетеді екен. Барлығы бір тілде сөйлейтін түркиялықтардың 99 пайызы мұсылмандардан тұрады.
