Қазақстанда 2026 жылғы қаңтар-наурыз айларындағы әлеуметтік-экономикалық даму қорытындысы бойынша жалпы ішкі өнімнің өсімі 3%-ды құрады. Бұл туралы 14 сәуірде ҚР Үкіметінің баспасөз қызметі хабарлады. Премьер-министр Олжас Бектеновтың төрағалығымен өткен Үкімет отырысында республикалық бюджеттің атқарылуы және экономикалық даму нәтижелері қаралды.
Отырыста қаржы, энергетика, өнеркәсіп және құрылыс министрлері, ұлттық экономика және Ұлттық банк өкілдері, сондай-ақ бірқатар өңір әкімдері есеп берді. Премьер-министр Мемлекет басшысының тапсырмасына сәйкес сапалы әрі тұрақты экономикалық өсімді қамтамасыз ету негізгі міндет екенін атап өтті.
Үкімет басшысының айтуынша, ІЖӨ өсімі негізінен шикізаттық емес сектор есебінен қалыптасқан. Атап айтқанда, құрылыс саласында 14,8%, көлікте 12,8%, өңдеу өнеркәсібінде 8,5% өсім тіркелген. Бұл сыртқы экономикалық қиындықтарға қарамастан, экономиканың нақты секторындағы тұрақтылықты көрсетеді. Сонымен бірге бірқатар өңірлер жоспарлы көрсеткіштерге толық жете алмаған. Осыған байланысты Атырау және Ақмола облыстарының әкімдіктеріне жағдайды талдап, қосымша шаралар қабылдау тапсырылды.
Премьер-министр жыл соңына дейін экономикалық өсімді 5%-дан жоғары деңгейге жеткізу міндетін қойып, бар резервтерді толық пайдаланудың маңызын атап өтті. Ол сондай-ақ цифрландыру мен жасанды интеллектіні барлық салаларға енгізу қажеттігін айтты. Оның пікірінше, нақты өнеркәсіптік және инфрақұрылымдық жобаларды іске асыру – негізгі басымдық болуы тиіс.
Отырыста инфляцияны төмендету мәселесіне де ерекше назар аударылды. Наурыз айында инфляция 11%-ға дейін төмендегені айтылды. Үкіметке бағаны тұрақтандыру, макроэкономикалық тұрақтылықты сақтау және халықтың әл-ауқатын арттыру бойынша кешенді шараларды жалғастыру тапсырылды.
Азық-түлік қауіпсіздігін қамтамасыз ету мақсатында ауыл шаруашылығы саласында өнімділікті арттыру, жылыжайлар мен сүт өндірісін кеңейту, қайта өңдеуді дамыту міндеттелді. Сауда министрлігіне логистика мен сақтау инфрақұрылымын дамыту, әлеуметтік маңызы бар тауарлар бағасын бақылау тапсырылды. Сонымен қатар делдалдық схемаларды жою және ішкі нарықты отандық өніммен қамтамасыз ету жұмыстары күшейтіледі.
Премьер-министр көтерме базарлардағы заңсыз делдалдық пен бағаны негізсіз көтеру мәселелеріне тоқталып, құқық қорғау және бәсекелестікті қорғау органдарымен бірлесіп нақты шаралар қабылдауды тапсырды.
Экономиканың құрылымында өңдеу өнеркәсібінің рөлі артып келеді. Осы бағытта металлургия мен химия өнеркәсібін қолдау, жаңа өндірістерді іске қосу және өнім номенклатурасын кеңейту бойынша қосымша шаралар әзірленеді. «Самұрық-Қазына» қорына және тиісті министрліктерге шикізат базасын кеңейту және өндірістік әлеуетті арттыру тапсырылды.
Энергетика саласында да нақты міндеттер қойылды. Қашағандағы газ өңдеу зауытын аяқтау, Жаңаөзен зауытын іске қосу және газ тасымалдау инфрақұрылымын кеңейту жобалары стратегиялық маңызға ие екені айтылды. Сонымен қатар мұнай өндіру көлемін арттыру бойынша жер қойнауын пайдаланушылармен келіссөздер жүргізу жалғасады.
Көлік саласында теміржол және порт инфрақұрылымын жаңғырту, сондай-ақ 11 мың шақырым автожолды жөндеу және салу жоспарланған.
Ауыл шаруашылығы секторында қаржыландыру қолжетімділігін арттыру, сақтандыру және кепілдік беру құралдарын дамыту мәселелері қарастырылды. Сонымен қатар агроөнеркәсіп кешенін қолдауға бағытталған нормативтік өзгерістер енгізіледі.
Құрылыс саласында тұрғын үй құрылысын қаржыландыру және инженерлік инфрақұрылымды тарту мәселелері өзекті күйде қалып отыр. Бұл бағытта жергілікті бюджеттер арқылы қаржыландыру тетіктерін жетілдіру және әкімдіктердің жауапкершілігін арттыру тапсырылды.
Жалпы алғанда, Үкімет экономикалық өсімді жеделдету, инфляцияны бақылау, инвестиция тарту және нақты секторды дамыту бағытындағы шараларды күшейтіп отыр. Премьер-министр барлық мемлекеттік органдарға нақты нәтижеге бағытталған жұмыс жүргізу қажеттігін ескертіп, әр басшының жеке жауапкершілігін атап өтті.
Қорытындылай келе, Үкіметтің басты мақсаты – тұрақты экономикалық өсімді қамтамасыз ету, халықтың әл-ауқатын арттыру және ел экономикасының бәсекеге қабілеттілігін күшейту болып қала береді.
Дайындаған – Ерқазы Сейтқали
