«AMANAT» партиясының қаңтар айынан бастап жарияланған «Үздік қоғамдық қабылдау бөлмесі» байқауында Батыс Қазақстан облысы бойынша үздіктер анықталды. Бұл туралы «AMANAT» партиясы Батыс Қазақстан облыстық филиалының баспасөз қызметі хабарлады. Аталмыш филиалға қарасты аумақтық филиалдар арасында үздіктерді анықтау үшін биылғы 10 ақпанда облыстық комиссия отырысы өткізілген. Байқауға қатысқан қабылдау бөлмелерін бағалау жұмыстары бірнеше бағыт бойынша жүзеге асырылды. Яғни, «Азаматтарды жеке, оның ішінде көшпелі қабылдау» бағытында – азаматтарды қабылдауды ұйымдастырудың жүйелілігі мен сапасы, «Қоғамдық қабылдау бөлмелерінің жұмысы туралы талдамалық дайджест» бағытында – жүзеге асырылатын қызметті таныстыру, визуалды баяндау, қоғамдық қабылдау бөлмесінің жетістіктері мен қол жеткізген нәтижелерін көрсету мүмкіндіктері, «Құқықтық көмек» партиялық жобасында – халықтың құқықтық сауаттылығын арттыру жұмыстары бағаланды. Комиссия отырысының нәтижесінде өңіріміздегі Сырым, Жәнібек, Ақжайық, Тасқала аудандарындағы қоғамдық қабылдау бөлмелері үздіктер қатарынан табылды.
Жалпы Батыс Қазақстан облысында жыл басынан бері 7190 өтініш тіркелген. Қоғамдық қабылдау бөлмелеріне келіп түскен өтініштер негізінде азаматтардың мәселесін оң шешу көрсеткіші 76%-ды құрайды. Барлық деңгейдегі мәслихат депутаттары мен мемлекеттік атқарушы орган басшылары және құқық қорғаушылар 1664 қабылдау өткізіп, 3392 азаматты қабылдаған.
Ләззат ҚАЖЫМОВА,
БҚО Орал қаласы
