Әулиеата өңіріне жұмыс сапарымен келген ҚР Премьер-министрінің орынбасары Е.Тоғжанов шаруаларға барынша қолдау көрсетуді тапсырды
Мемлекет басшысының тапсырмасына сәйкес әзірленген «Халықтың табысын арттыру бағдарламасын» іске асыру аясында ҚР Премьер-Министрінің орынбасары Ералы Тоғжанов бастаған үкіметтік делегация жұмыс сапарымен Жамбыл облысына келді.
Жұмыс сапары барысында вице-премьерге облыс әкімі Нұржан Нұржігітов «Жамбыл облысы тұрғындарының тұрмыстық табысын арттыру» пилоттық жобасының жүзеге асу барысы мен нәтижесі туралы баяндады.
Аймақ басшсы аталған жоба аясында облыстың 10 ауданындағы 11 пилоттық ауылдық округінің (25 елді мекен) тұрғындары мен жаңадан ашылған 11 ауыл шаруашылығы кооперативі несиелендірілгенін айтып өтті.
– Бес бағыт бойынша жүзеге асқан пилоттық жобаның бірінші кезеңі бойынша жеке кәсіпкерлер саны 2282-ге артып, 589 жаңа жұмыс орындары ашылды. Атаулы әлеуметтік көмек алушылар саны 1058 отбасыға немесе 65 пайызға кеміді. Бұдан бөлек, қатысушылардың орташа айлық табысы 44 мың теңгеден 73 мың теңгеге, немесе 165 пайызға артты.
Қатысушылар жеке қосалқы шаруашылықтарын дамыта отырып, үй іргесіндегі жерді игеру көрсеткішін 329 гектарға арттырды. Сонымен қатар жалпы көлемі 2 гектар құрайтын 14 жылыжай салынды. 11 тұрғын өз кәсібін ашып, жобасын іске қосты. Пилоттық округтердегі мал саны 37 308 басқа (125 пайызға) өсті, – деді Н.Нұржігітов.
Жобаның тиімділігін тілге тиек еткен ол оның ауқымын кеңейте отырып, ары қарай жалғастыру қажеттігін де атап өтті.
Ералы Тоғжанов шаруасын шалқытып отырған аулалар мен шағын кәсіпорындарды аралап, жай-күйімен танысты. Жобаның жоғары мультипликативтік тиімділігіне назар аударып, тұрғындардың тұрмысын арттырудағы маңыздылығын айтып, еліміздің басқа облыстарына бұл тәжірибені тарату керектігін жеткізді.
Жалпы, Жамбыл облысына жұмыс сапарымен келген ҚР Премьер-Министрінің орынбасары Ералы Тоғжанов Байзақ ауданындағы ауыл тұрғындарының табысын арттыру жөніндегі пилоттық жоба бойынша құрылған «Қостөбе-2019» ауыл шаруашылығы кооперативін аралаудан бастады.
Пилоттық жобаға Байзақ ауданынан Қостөбе ауылдық округінің тұрғындары қатысқан болатын. 178 тұрғыннан құралған кооперативте 12 бірлік ауыл шаруашылығы техникасы сатып алынған. Оның базасындағы ауыл шаруашылығы мақсатындағы жерлердің жалпы ауданы 401,0 га құрайды, пилоттық жобаның екінші бағыты (мал шаруашылығын дамыту) аясында кооператив құрамына кіретін «Алмас» ЖК 7 бас жылқы, «Айдын» ЖК 9 бас ІМҚ сатып алған.
Жалпы жобаны жүзеге асырудың арқасында Қостөбе ауылдық округіндегі бір отбасының табысы 4 есеге артқан. Сонымен қатар мал басының саны да 53,8%-ға өскен. Барлығы 256 тұрғын жеке кәсіпкер ретінде тіркеліп, 123 жаңа жұмыс орны ашылған. АӘК алушылар саны 86%-ға азайған. Бір сөзбен айтқанда тұрғындардың 97%-ы жеке қосалқы шаруашылықтарды дамытып жатыр.
Сапар барысында Ералы Тоғжанов ауыл шаруашылығы техникаларының жай-күйімен танысып, облыс шаруаларымен өзекті мәселелерді талқылады, жергілікті атқарушы органдарға ауыл шаруашылығы кооперативтеріне толық қолдау көрсетуді тапсырды.
